kaam liya jab lafzon hi se KHud ko bas nakaam kiya

kaam liyā jab lafzoñ hī se ḳhud ko bas nākām kiyā

baat asar-andāz huī jab she'roñ ko paiġhām kiyā

ye kaise saarī duniyā meñ aaj bahut mash.hūr ho tum

vaise to saarī duniyā ne tum ko bahut gumnām kiyā

yak-rangī se 'ājiz aa kar rangā-rangī kī ḳhātir

jo mujh ko raas aayā thā us nīlam ko nīlām kiyā

aksar tanhā.ī meñ mujh ko yaad aa jaatā hai vo sab

haañ āġhāz se pahle hī jis ko maiñ ne anjām kiyā

ḳhāmoshī pas fan hai ḳhudā kā sīkhā ham ne bhī lekin

har-sū roz machāyā tahalka yā paidā kohrām kiyā

vaqt ke saath aur aap ke hāthoñ qadreñ kitnī badlī haiñ

ek ilzām se kitnā kam hai hāsil jo in'ām kiyā

kahiye husn aur 'ishq ko de kar apne dil ke ḳhuun kā lams

kis ne use gul-rang kiyā phir kis ne use gulfām kiyā

ab kā fasād ārām se guzre is koshish meñ us ne to

qashqa khīñchā dair meñ baiThā kab kā tark islām kiyā

kaam liya jab lafzon hi se KHud ko bas nakaam kiya

baat asar-andaz hui jab she'ron ko paigham kiya

ye kaise sari duniya mein aaj bahut mashhur ho tum

waise to sari duniya ne tum ko bahut gumnam kiya

yak-rangi se 'ajiz aa kar ranga-rangi ki KHatir

jo mujh ko ras aaya tha us nilam ko nilam kiya

aksar tanhai mein mujh ko yaad aa jata hai wo sab

han aaghaz se pahle hi jis ko main ne anjam kiya

KHamoshi pas fan hai KHuda ka sikha hum ne bhi lekin

har-su roz machaya tahalka ya paida kohram kiya

waqt ke sath aur aap ke hathon qadren kitni badli hain

ek ilzam se kitna kam hai hasil jo in'am kiya

kahiye husn aur 'ishq ko de kar apne dil ke KHun ka lams

kis ne use gul-rang kiya phir kis ne use gulfam kiya

ab ka fasad aaram se guzre is koshish mein us ne to

qashqa khincha dair mein baiTha kab ka tark islam kiya