kaamyabon mein kaamranon mein

kāmyāboñ meñ kāmrānoñ meñ

ham baḌe haiñ baḌe gharānoñ meñ

vo ḳhamoshī hai 'aql-ḳhānoñ meñ

sīTiyāñ baj rahī haiñ kānoñ meñ

kis tarah qaht-e-fikr aa pahuñchā

hosh-mandoñ meñ fikr-dānoñ meñ

hijr har din manāyā jaatā hai

'ishq vāloñ ke ḳhāndānoñ meñ

un kī kamiyoñ ko Dhak diyā kiije

dil bhī hai dil ke kār-ḳhānoñ meñ

tum bhī kamzor aadmī nikle

tum bhī jā baiThe bad-gumānoñ meñ

merī jholī meñ Daal de us ko

kyā kamī hai tire ḳhazānoñ meñ

ham ne patthar saje hue dekhe

qīmtī kāñch kī dukānoñ meñ

aaj kyoñ chāñd itnā raushan hai

hañs paḌā kaun āsmānoñ meñ

ug paḌe bāñjh dhartiyoñ se gulāb

bol uThe log be-zabānoñ meñ

mere she'roñ pe tabsira hai 'sa'ūd'

gul-kadoñ meñ gulāb-ḳhānoñ meñ

kaamyabon mein kaamranon mein

hum baDe hain baDe gharanon mein

wo KHamoshi hai 'aql-KHanon mein

siTiyan baj rahi hain kanon mein

kis tarah qaht-e-fikr aa pahuncha

hosh-mandon mein fikr-danon mein

hijr har din manaya jata hai

'ishq walon ke KHandanon mein

un ki kamiyon ko Dhak diya kije

dil bhi hai dil ke kar-KHanon mein

tum bhi kamzor aadmi nikle

tum bhi ja baiThe bad-gumanon mein

meri jholi mein Dal de us ko

kya kami hai tere KHazanon mein

hum ne patthar saje hue dekhe

qimti kanch ki dukanon mein

aaj kyon chand itna raushan hai

hans paDa kaun aasmanon mein

ug paDe banjh dhartiyon se gulab

bol uThe log be-zabanon mein

mere she'ron pe tabsira hai 'sa'ud'

gul-kadon mein gulab-KHanon mein