kanon mein nachti thi kisi bansuri ki lahr

kānoñ meñ nāchtī thī kisī bāñsurī kī lahr

āñchal meñ bhar ke laa.e the ham chāñdnī kī lahr

phir tiir kas rahā thā mire dil kī siidh meñ

tārāj kar ga.ī mujhe sharmindagī kī lahr

dariyā ko kis ke hijr ne pāmāl kar diyā

phir chāñd raat meñ uThī dīvāngī kī lahr

patthar tarāshte the tirī sūratoñ ke ham

aur sar meñ jāgtī thī tirī bandagī kī lahr

phir hijr zindagī meñ qarīne se aa gayā

muskān meñ dabī rahī afsurdagī kī lahr

kuchh ishq merī fahm se aage guzar gayā

kuchh ḳhaak meñ bikhartī ga.ī zindagī kī lahr

ye zindagī dhanak sī khulī aur bujh ga.ī

pīchhe thī ek miTtī huī ruḳhsatī kī lahr

bistar lagā ga.e haiñ añdhere makān meñ

shāyad 'sahar' yahīñ ho kahīñ raushnī kī lahr

kanon mein nachti thi kisi bansuri ki lahr

aanchal mein bhar ke lae the hum chandni ki lahr

phir tir kas raha tha mere dil ki sidh mein

taraj kar gai mujhe sharmindagi ki lahr

dariya ko kis ke hijr ne pamal kar diya

phir chand raat mein uThi diwangi ki lahr

patthar tarashte the teri suraton ke hum

aur sar mein jagti thi teri bandagi ki lahr

phir hijr zindagi mein qarine se aa gaya

muskan mein dabi rahi afsurdagi ki lahr

kuchh ishq meri fahm se aage guzar gaya

kuchh KHak mein bikharti gai zindagi ki lahr

ye zindagi dhanak si khuli aur bujh gai

pichhe thi ek miTti hui ruKHsati ki lahr

bistar laga gae hain andhere makan mein

shayad 'sahar' yahin ho kahin raushni ki lahr