kanTe hain kahin aag kahin sang kahin hai

kāñTe haiñ kahīñ aag kahīñ sang kahīñ hai

ye rāh-e-mohabbat hai kuchh āsān nahīñ hai

tū paas agar hai to har ik chiiz hasīñ hai

sahrā bhī nigāhoñ meñ mirī ḳhuld-e-barīñ hai

tā-umr nibhāne kī qasam khaa.ī thī tū ne

vo ahd-e-mohabbat bhī tujhe yaad nahīñ hai

ho jaa.e fanā zāt-e-ḳhudā meñ jo koī zaat

kyā DhūñDte ho us ko makāñ hai na makīñ hai

ai husn-e-haqīqat tū kabhī jalva dikhā de

sajdoñ kī amānat liye betāb jabīñ hai

vo chāhe to qadmoñ meñ zamāne ke jhukāve

kahne ko tire dar kā gadā ḳhāk-nashīñ hai

ehsās-e-ġham-e-dūrī huā hī nahīñ mujh ko

mahsūs huā jab se ki tū dil ke qarīñ hai

bikhrā huā maiḳhāne kā shīrāza hai kab se

saaqī hai kahīñ mai hai kahīñ jaam kahīñ hai

haiñ jalve nigāhoñ meñ mirī kaun-o-makāñ ke

chhup jaa.e koī mujh se ye mumkin hī nahīñ hai

kyā nazr karūñ gardish-e-daurāñ ko 'zamīr' aaj

jiine kī tamanna bhī mire paas nahīñ hai

kanTe hain kahin aag kahin sang kahin hai

ye rah-e-mohabbat hai kuchh aasan nahin hai

tu pas agar hai to har ek chiz hasin hai

sahra bhi nigahon mein meri KHuld-e-barin hai

ta-umr nibhane ki qasam khai thi tu ne

wo ahd-e-mohabbat bhi tujhe yaad nahin hai

ho jae fana zat-e-KHuda mein jo koi zat

kya DhunDte ho us ko makan hai na makin hai

ai husn-e-haqiqat tu kabhi jalwa dikha de

sajdon ki amanat liye betab jabin hai

wo chahe to qadmon mein zamane ke jhukawe

kahne ko tere dar ka gada KHak-nashin hai

ehsas-e-gham-e-duri hua hi nahin mujh ko

mahsus hua jab se ki tu dil ke qarin hai

bikhra hua maiKHane ka shiraaza hai kab se

saqi hai kahin mai hai kahin jam kahin hai

hain jalwe nigahon mein meri kaun-o-makan ke

chhup jae koi mujh se ye mumkin hi nahin hai

kya nazr karun gardish-e-dauran ko 'zamir' aaj

jine ki tamanna bhi mere pas nahin hai