kanTon ki mayyat mein baDi der raha hai

kāñToñ kī ma.ayyat meñ baḌī der rahā hai

jis shaḳhs kī bātoñ meñ gulāboñ kā asar hai

manzil abhī aage hai ki chhoḌ aayā huuñ pīchhe

muddat se safar meñ huuñ mujhe itnī ḳhabar hai

shohrat kī talab hai ki hai iz.hār kā chaskā

ye kasb-e-satā.ish hai ki phir kasb-e-hunar hai

tū baalā hai rutbe meñ so maiñ maan rahā huuñ

hālāñki tirī baat kā paañv hai na sar hai

ai yaar batā kuchh to mohabbat kī haqīqat

makḌī kā ye jaalā hai ki phir dām-e-nazar hai

iḳhlās hī baa.is thā ta.alluq kā hamāre

lekin vo mire hamdam-e-derīna kidhar hai

maiñ yaar samajhtā huuñ zamāna tujhe ham-rāz

tū ek zamāne se idhar hai na udhar hai

kis moḌ pe le aa.ī hai ab terī mohabbat

jab tere bichhaḌne meñ nafā hai na zarar hai

'jāzib' nahīñ khilte haiñ bagūloñ meñ saman to

aur tū ki tamannā.ī-e-e.ajāz-e-nazar hai

kanTon ki mayyat mein baDi der raha hai

jis shaKHs ki baaton mein gulabon ka asar hai

manzil abhi aage hai ki chhoD aaya hun pichhe

muddat se safar mein hun mujhe itni KHabar hai

shohrat ki talab hai ki hai izhaar ka chaska

ye kasb-e-sataish hai ki phir kasb-e-hunar hai

tu baala hai rutbe mein so main man raha hun

haalanki teri baat ka panw hai na sar hai

ai yar bata kuchh to mohabbat ki haqiqat

makDi ka ye jala hai ki phir dam-e-nazar hai

iKHlas hi bais tha talluq ka hamare

lekin wo mere hamdam-e-derina kidhar hai

main yar samajhta hun zamana tujhe ham-raaz

tu ek zamane se idhar hai na udhar hai

kis moD pe le aai hai ab teri mohabbat

jab tere bichhaDne mein nafa hai na zarar hai

'jazib' nahin khilte hain bagulon mein saman to

aur tu ki tamannai-e-eajaz-e-nazar hai