kanTon ne tham tham ke daman kabhi kabhi

kāñToñ ne thaam thaam ke dāmāñ kabhī kabhī

pūchhī hai vajh-e-hāl-e-pareshāñ kabhī kabhī

mushkil huī hai ziist meñ āsāñ kabhī kabhī

sāhil kā lutf de gayā tūfāñ kabhī kabhī

kitnī latīf-o-shabnamī hotī hai zindagī

ro kar to dekh ai gul-e-ḳhandāñ kabhī kabhī

māhaul ai asīr-e-qafas ḳhū badal na de

phirtā rahe nazar meñ gulistāñ kabhī kabhī

mere mazāq-e-ishq pe uThtī haiñ uñgliyāñ

kāfir kabhī kabhī huuñ musalmāñ kabhī kabhī

dil meñ samā rahī haiñ do-ālam kī vus.ateñ

kartā huuñ uzr-e-tangī-e-dāmāñ kabhī kabhī

tasvīr kī zabāñ se 'musavvir' kī dāstāñ

suntī hai tham ke gardish-e-daurāñ kabhī kabhī

kanTon ne tham tham ke daman kabhi kabhi

puchhi hai wajh-e-haal-e-pareshan kabhi kabhi

mushkil hui hai zist mein aasan kabhi kabhi

sahil ka lutf de gaya tufan kabhi kabhi

kitni latif-o-shabnami hoti hai zindagi

ro kar to dekh ai gul-e-KHandan kabhi kabhi

mahaul ai asir-e-qafas KHu badal na de

phirta rahe nazar mein gulistan kabhi kabhi

mere mazaq-e-ishq pe uThti hain ungliyan

kafir kabhi kabhi hun musalman kabhi kabhi

dil mein sama rahi hain do-alam ki wusaten

karta hun uzr-e-tangi-e-daman kabhi kabhi

taswir ki zaban se 'musawwir' ki dastan

sunti hai tham ke gardish-e-dauran kabhi kabhi