kanTon se kyon itni nafrat

kāñToñ se kyoñ itnī nafrat

kāñTe bhī haiñ baaġh kī zīnat

un kā ġham aur un kī mohabbat

ye bhī ne.amat vo bhī ne.amat

chāñd bhī hai taare bhī lekin

shām-e-furqat shām-e-furqat

āñkheñ haiñ to paḌhte chaliye

har zarra hai ek hikāyat

kāñToñ kā muñh chuum rahā huuñ

dekh ke fasl-e-gul kī hālat

maiñ aur merī tishna-kāmī

saaqī aur da.avā-e-saḳhāvat

bejā hai qismat kā shikva

himmat se bantī hai qismat

dair-o-haram ke jhagḌe chhoḌo

husn-e-amal hai asl ibādat

rahmat ne dāman phailāyā

dekh ke mere ashk-e-nadāmat

kyoñ na tirā ġham dil meñ chhupā luuñ

terā ġham hai merī daulat

maut kī ḳhvāhish karne vaalo

bhuul ga.e kyā ziist kī azmat

maiñ bhī chup huuñ vo bhī chup haiñ

ye bhī hai andāz-e-mohabbat

kaise 'bahār' un ko maiñ bhulā duuñ

un kā ġham hai merī qismat

kanTon se kyon itni nafrat

kanTe bhi hain bagh ki zinat

un ka gham aur un ki mohabbat

ye bhi neamat wo bhi neamat

chand bhi hai tare bhi lekin

sham-e-furqat sham-e-furqat

aankhen hain to paDhte chaliye

har zarra hai ek hikayat

kanTon ka munh chum raha hun

dekh ke fasl-e-gul ki haalat

main aur meri tishna-kaami

saqi aur dawa-e-saKHawat

beja hai qismat ka shikwa

himmat se banti hai qismat

dair-o-haram ke jhagDe chhoDo

husn-e-amal hai asl ibaadat

rahmat ne daman phailaya

dekh ke mere ashk-e-nadamat

kyon na tera gham dil mein chhupa lun

tera gham hai meri daulat

maut ki KHwahish karne walo

bhul gae kya zist ki azmat

main bhi chup hun wo bhi chup hain

ye bhi hai andaz-e-mohabbat

kaise 'bahaar' un ko main bhula dun

un ka gham hai meri qismat