kar-e-junun ki chaaragar kuchh tujhe aagahi nahin

kār-e-junūñ kī chārāgar kuchh tujhe āgahī nahīñ

dāman-e-tār-tār meñ kār-e-rafū-garī nahīñ

nāz-o-niyāz meñ kahāñ ālam-e-sarmadī nahīñ

husn bhī aarzī nahīñ ishq bhī aarzī nahīñ

terī talāsh meñ mujhe aur talāsh hī nahīñ

tere sivā koī mirā maqsad-e-zindagī nahīñ

jis se surūr dil meñ hai jis se ġhurūr sar meñ ho

ālam-e-bekasī meñ vo daulat-e-zindagī nahīñ

shān-e-vaqār-o-jāh agar bas kī nahīñ to kyā huā

ijz se kaam lījiye is meñ to ājizī nahīñ

aish kī sarḳhushī vabāl bazm-e-tarab kā rag rog

mahfil-e-soz-o-sāz meñ naġhma-e-zindagī nahīñ

naam hī naam rah gayā aap kī bazm-e-nāz kā

ab koī is ko kyā kahe chāñd hai chāñdnī nahīñ

sar pe khaḌī hai shām-e-ġham bujh ga.e aql ke charāġh

tīrgī-e-hayāt meñ ab koī raushnī nahīñ

ġhuncha-o-gul fasurda haiñ saarī fazā ḳhamosh hai

ḳhātir-e-ġham-navāz se ziist meñ tāzgī nahīñ

serī-e-zauq-e-dīd ko ab vo maqām chāhiye

ālam-e-hosh hai jahāñ ālam-e-be-ḳhudī nahīñ

apnī ravish se mutma.in 'ḳhushtar'-e-ḳhush-ḳhirām hai

apnoñ se ġhairiyat nahīñ ġhair se dushmanī nahīñ

kar-e-junun ki chaaragar kuchh tujhe aagahi nahin

daman-e-tar-tar mein kar-e-rafu-gari nahin

naz-o-niyaz mein kahan aalam-e-sarmadi nahin

husn bhi aarzi nahin ishq bhi aarzi nahin

teri talash mein mujhe aur talash hi nahin

tere siwa koi mera maqsad-e-zindagi nahin

jis se surur dil mein hai jis se ghurur sar mein ho

aalam-e-bekasi mein wo daulat-e-zindagi nahin

shan-e-waqar-o-jah agar bas ki nahin to kya hua

ijz se kaam lijiye is mein to aajizi nahin

aish ki sarKHushi wabaal bazm-e-tarab ka rag rog

mahfil-e-soz-o-saz mein naghma-e-zindagi nahin

nam hi nam rah gaya aap ki bazm-e-naz ka

ab koi is ko kya kahe chand hai chandni nahin

sar pe khaDi hai sham-e-gham bujh gae aql ke charagh

tirgi-e-hayat mein ab koi raushni nahin

ghuncha-o-gul fasurda hain sari faza KHamosh hai

KHatir-e-gham-nawaz se zist mein tazgi nahin

seri-e-zauq-e-did ko ab wo maqam chahiye

aalam-e-hosh hai jahan aalam-e-be-KHudi nahin

apni rawish se mutmain 'KHushtar'-e-KHush-KHiram hai

apnon se ghairiyat nahin ghair se dushmani nahin