kar-e-suKHan-arai hai tanhai hamari

kār-e-suḳhan-ārā.ī hai tanhā.ī hamārī

hangāma-e-aflāk hai shunavā.ī hamārī

ham ahl-e-sabā-ḳhānī-o-gul-kār haiñ phir bhī

hotī rahī is shahr meñ rusvā.ī hamārī

gaañv kī taraf naqsh-e-kaf-e-pā the hamāre

phir shahr-e-ḳhush-ābād ko yaad aa.ī hamārī

tum vāris-e-sahrā-e-numū-yās ho lekin

tābinda hai us ret pe harjā.ī hamārī

ik 'umr pas-e-nelmī parde meñ guzārī

tab jā ke zamīñ-zād ko baas aa.ī hamārī

bistar mirā qirtās hai misre haiñ mire ḳhvāb

takmīl-e-ġhazal hotī hai añgḌā.ī hamārī

kar-e-suKHan-arai hai tanhai hamari

hangama-e-aflak hai shunawai hamari

hum ahl-e-saba-KHani-o-gul-kar hain phir bhi

hoti rahi is shahr mein ruswai hamari

ganw ki taraf naqsh-e-kaf-e-pa the hamare

phir shahr-e-KHush-abaad ko yaad aai hamari

tum waris-e-sahra-e-numu-yas ho lekin

tabinda hai us ret pe harjai hamari

ek 'umr pas-e-nelmi parde mein guzari

tab ja ke zamin-zad ko bas aai hamari

bistar mera qirtas hai misre hain mere KHwab

takmil-e-ghazal hoti hai angDai hamari