kar-e-wahshat mein bhi majbur hai insan ab tak

kār-e-vahshat meñ bhī majbūr hai insāñ ab tak

haath apnā hai aur apnā hī garebāñ ab tak

dhajjiyāñ mere garebāñ kī uḌī phirtī haiñ

gūñjtā hai mire na.aroñ se bayābāñ ab tak

kab se maiñ kunj-e-ġham-e-dil meñ chhupā baiThā huuñ

yaad kartī hai mujhe shorish-e-daurāñ ab tak

mere hisse meñ bhī hai daulat-e-bedārī-e-shab

ik ḳhalish sī hai matā-e-ġham-e-pinhāñ ab tak

but-kada TuuT ke ka.abe kī banā Daal gayā

dil jo ujḌā to hai ik umr se vīrāñ ab tak

tū guzargāh-e-tamannā meñ thā ik partv-e-māh

maiñ añdheroñ meñ bhaTaktā huuñ hirāsāñ ab tak

tū vo sūraj thā ki mausam kī na thī tujh ko ḳhabar

maiñ huuñ āñdhī meñ charāġh-e-tah-e-dāmāñ ab tak

mere ehsās kī garmī mire dil kī barsāt

sab ruteñ haiñ tirī āñkhoñ se numāyāñ ab tak

ek sūrat thī jo āñkhoñ meñ liye phirtā huuñ

ek vahshat thī jo rakhtī hai pareshāñ ab tak

chand yādeñ haiñ mirī ziist kā hāsil 'bāqar'

inhīñ yādoñ ke sahāre huuñ ġhazal-ḳhvāñ ab tak

kar-e-wahshat mein bhi majbur hai insan ab tak

hath apna hai aur apna hi gareban ab tak

dhajjiyan mere gareban ki uDi phirti hain

gunjta hai mere naron se bayaban ab tak

kab se main kunj-e-gham-e-dil mein chhupa baiTha hun

yaad karti hai mujhe shorish-e-dauran ab tak

mere hisse mein bhi hai daulat-e-bedari-e-shab

ek KHalish si hai mata-e-gham-e-pinhan ab tak

but-kada TuT ke kabe ki bana Dal gaya

dil jo ujDa to hai ek umr se viran ab tak

tu guzargah-e-tamanna mein tha ek partw-e-mah

main andheron mein bhaTakta hun hirasan ab tak

tu wo suraj tha ki mausam ki na thi tujh ko KHabar

main hun aandhi mein charagh-e-tah-e-daman ab tak

mere ehsas ki garmi mere dil ki barsat

sab ruten hain teri aankhon se numayan ab tak

ek surat thi jo aankhon mein liye phirta hun

ek wahshat thi jo rakhti hai pareshan ab tak

chand yaaden hain meri zist ka hasil 'baqar'

inhin yaadon ke sahaare hun ghazal-KHwan ab tak