karobar-e-zindagi se jis ka dil ghabraega

kārobār-e-zindagī se jis kā dil ghabrā.egā

yaar kī zulf-e-rasā ke saa.e meñ aa jā.egā

tazkira ruḳhsār kā yā zikr-e-zulf-e-yār ho

kaif āñkhoñ meñ yaqīnan kuchh na kuchh chhā jā.egā

jo manāzir aaj tak tum ne kabhī dekhe nahīñ

koī tum ko vo manāzir ek din dikhlā.egā

ab karam-farmā.iyāñ hoñ yā itāb-e-nāz ho

aap ke dast-e-karam se dil sila kuchh pā.egā

vaqt kī uljhī huī zulfeñ sañvāreñ kis tarah

ahl-e-dil ko ye salīqa ḳhud-baḳhud aa jā.egā

aap pahle hañs ke ġham khāte rahe 'sābir' magar

ab yahī ġham rafta rafta aap ko khā jā.egā

karobar-e-zindagi se jis ka dil ghabraega

yar ki zulf-e-rasa ke sae mein aa jaega

tazkira ruKHsar ka ya zikr-e-zulf-e-yar ho

kaif aankhon mein yaqinan kuchh na kuchh chha jaega

jo manazir aaj tak tum ne kabhi dekhe nahin

koi tum ko wo manazir ek din dikhlaega

ab karam-farmaiyan hon ya itab-e-naz ho

aap ke dast-e-karam se dil sila kuchh paega

waqt ki uljhi hui zulfen sanwaren kis tarah

ahl-e-dil ko ye saliqa KHud-baKHud aa jaega

aap pahle hans ke gham khate rahe 'sabir' magar

ab yahi gham rafta rafta aap ko kha jaega