karwan aaj bhi sargarm-e-safar hai shayad

kārvāñ aaj bhī sargarm-e-safar hai shāyad

ab bhī pur-pech koī rāhguzar hai shāyad

mo'tarif vo bhī haiñ kal tak jo muḳhālif the mire

ye mirī kāvish-o-mehnat kā samar hai shāyad

log hāthoñ meñ uThā.e hue patthar dauḌe

rāste meñ kisī dīvāne kā ghar hai shāyad

maañ se vā'da thā ki maiñ lauT ke ghar ā.ūñgā

muntazir aaj bhī vo dīda-e-tar hai shāyad

log sahme hue baiThe haiñ makāñ meñ apne

phir isī samt se tūfāñ kā guzar hai shāyad

mere qātil ne mujhe dekh ke pahchān liyā

ye to is daur kā e’jāz-e-nazar hai shāyad

mal rahā hai kaf-e-afsos baḌī der se vo

us ke TuuTe hue ḳhvāboñ kā asar hai shāyad

ab bhī har shai hai dhuñdalkoñ kā labāda oḌhe

shām-āgīñ mirī duniyā kī sahar hai shāyad

nīm-'bismil' sā mujhe kar ga.iiñ jis kī nazreñ

vo koī aur nahīñ rashk-e-qamar hai shāyad

karwan aaj bhi sargarm-e-safar hai shayad

ab bhi pur-pech koi rahguzar hai shayad

mo'tarif wo bhi hain kal tak jo muKHalif the mere

ye meri kawish-o-mehnat ka samar hai shayad

log hathon mein uThae hue patthar dauDe

raste mein kisi diwane ka ghar hai shayad

man se wa'da tha ki main lauT ke ghar aaunga

muntazir aaj bhi wo dida-e-tar hai shayad

log sahme hue baiThe hain makan mein apne

phir isi samt se tufan ka guzar hai shayad

mere qatil ne mujhe dekh ke pahchan liya

ye to is daur ka e’jaz-e-nazar hai shayad

mal raha hai kaf-e-afsos baDi der se wo

us ke TuTe hue KHwabon ka asar hai shayad

ab bhi har shai hai dhundalkon ka labaada oDhe

sham-agin meri duniya ki sahar hai shayad

nim-'bismil' sa mujhe kar gain jis ki nazren

wo koi aur nahin rashk-e-qamar hai shayad