kash aae sada ishq ki tashhir se pahle

kaash aa.e sadā 'ishq kī tash.hīr se pahle

ye ḳhvāb bikhar jaate haiñ tā'bīr se pahle

kuchh dard sadā ke liye hote haiñ musallat

kuchh jāneñ nikal jaatī haiñ zanjīr se pahle

ye qaid-o-qafas in ke tatabbo’ meñ bane haiñ

zindāñ the kahāñ zulf-e-girah-gīr se pahle

jab TuuT ke bikhre to ye ik baat samajh aa.ī

tasḳhīr huā karte haiñ tasḳhīr se pahle

aa.e to koī kaise muqābil ki vo nazreñ

siine meñ utar jaatī haiñ shamshīr se pahle

kamre kī divāroñ pe nishāñ dekh rahe ho

vahshat thī yahāñ aap kī tasvīr se pahle

kyā jaan sako tum ki hai luT jaanā balā kyā

pūchho kabhī haare hue rah-gīr se pahle

likhtā thā maiñ palkoñ pe kahānī ġham-e-dil kī

ashkoñ kā hunar aatā thā tahrīr se pahle

jab pahle utārā hī gayā ho na ye 'sādiq'

phir kaise ġhazal-ḳhvāñ ho bhalā 'mīr' se pahle

kash aae sada 'ishq ki tashhir se pahle

ye KHwab bikhar jate hain ta'bir se pahle

kuchh dard sada ke liye hote hain musallat

kuchh jaanen nikal jati hain zanjir se pahle

ye qaid-o-qafas in ke tatabbo’ mein bane hain

zindan the kahan zulf-e-girah-gir se pahle

jab TuT ke bikhre to ye ek baat samajh aai

tasKHir hua karte hain tasKHir se pahle

aae to koi kaise muqabil ki wo nazren

sine mein utar jati hain shamshir se pahle

kamre ki diwaron pe nishan dekh rahe ho

wahshat thi yahan aap ki taswir se pahle

kya jaan sako tum ki hai luT jaana bala kya

puchho kabhi haare hue rah-gir se pahle

likhta tha main palkon pe kahani gham-e-dil ki

ashkon ka hunar aata tha tahrir se pahle

jab pahle utara hi gaya ho na ye 'sadiq'

phir kaise ghazal-KHwan ho bhala 'mir' se pahle