kash hindu na musalman hota

kaash hindū na musalmāñ hotā

sirf ik pyārā sā insāñ hotā

amn ke phuul mahakte har-sū

har nagar ek gulistāñ hotā

dharm ke naam pe hote na fasād

fitna-o-shar kā na tūfāñ hotā

zindagī bantī na vīrān khañDar

ḳhuun insāñ kā na arzāñ hotā

shahr kī ruuh na hotī ghāyal

itnā ḳhuñḳhār na insāñ hotā

is tarah bantā na haivān bashar

amn maz.hab pe na qurbāñ hotā

ziist rah jaatī na maqtal ban kar

pyaar kā baaġh na vīrāñ hotā

zindagī sabr-o-sukūñ se kaTtī

koī be-ghar na pareshāñ hotā

daur taḳhrīb kā hai 'nāzlī' kaash

koī ta.amīr kā sāmāñ hotā

kash hindu na musalman hota

sirf ek pyara sa insan hota

amn ke phul mahakte har-su

har nagar ek gulistan hota

dharm ke nam pe hote na fasad

fitna-o-shar ka na tufan hota

zindagi banti na viran khanDar

KHun insan ka na arzan hota

shahr ki ruh na hoti ghayal

itna KHunKHar na insan hota

is tarah banta na haiwan bashar

amn mazhab pe na qurban hota

zist rah jati na maqtal ban kar

pyar ka bagh na viran hota

zindagi sabr-o-sukun se kaTti

koi be-ghar na pareshan hota

daur taKHrib ka hai 'nazli' kash

koi tamir ka saman hota