kaT kar jo rah ka buDha shajar le jaega

kaaT kar jo raah kā būḌhā shajar le jā.egā

saath apne dhuup kā lambā safar le jā.egā

ek sahrā be yaqīnī kā hai tā-hadd-e-nazar

qāfila-sālār dekheñ ab kidhar le jā.egā

apne apne hī gharoñ kī fikr gar karte rahe

dekhnā tūfān ye saarā nagar le jā.egā

be-gharoñ kī fikr karne kī zarūrat hī nahīñ

ek din koī farishta un ko ghar le jā.egā

kauḌiyoñ ke mol bik jā.egā ḳhud us kā vajūd

koī jab bāzār meñ apnā hunar le jā.egā

jis ke dil meñ koī ḳhvāhish koī armāñ hī nahīñ

saath apne be-bahā zād-e-safar le jā.egā

ye khulegā mujh pe āḳhir merī manzil hai kahāñ

jab junūñ 'tāsīr' mujh ko dar-ba-dar le jā.egā

kaT kar jo rah ka buDha shajar le jaega

sath apne dhup ka lamba safar le jaega

ek sahra be yaqini ka hai ta-hadd-e-nazar

qafila-salar dekhen ab kidhar le jaega

apne apne hi gharon ki fikr gar karte rahe

dekhna tufan ye sara nagar le jaega

be-gharon ki fikr karne ki zarurat hi nahin

ek din koi farishta un ko ghar le jaega

kauDiyon ke mol bik jaega KHud us ka wajud

koi jab bazar mein apna hunar le jaega

jis ke dil mein koi KHwahish koi arman hi nahin

sath apne be-baha zad-e-safar le jaega

ye khulega mujh pe aaKHir meri manzil hai kahan

jab junun 'tasir' mujh ko dar-ba-dar le jaega