katata hun raat-bhar apne lahu ki dhaar ko

kātatā huuñ rāt-bhar apne lahū kī dhaar ko

khīñchtā huuñ is tarah inkār se iqrār ko

be-qarārī kuchh to ho vaj.h-e-tasallī ke liye

bhīñch kar rakhtā huuñ siine se firāq-e-yār ko

apnī gustāḳhī pe nādim huuñ magar kyā ḳhuub hai

dhuup kī dīvār par likhnā shabīh-e-yār ko

aise kaTtā hai jigar aise lahū hotā hai dil

kaise kaise āzmātā huuñ nafas kī dhaar ko

nāchtā hai mere nabzoñ meñ ḳharosh-e-ḳhūñ ke saath

dhaḌkaneñ gintī haiñ us ke paañv kī raftār ko

reza reza chun rahā huuñ jism-o-jāñ kī sā.ateñ

Dhā rahā hai koī merī umr kī dīvār ko

ek saa.at kī judā.ī bhī nahīñ mujh ko qubūl

saath rakhtā huuñ sadā yād-e-firāq-e-yār ko

katata hun raat-bhar apne lahu ki dhaar ko

khinchta hun is tarah inkar se iqrar ko

be-qarari kuchh to ho wajh-e-tasalli ke liye

bhinch kar rakhta hun sine se firaq-e-yar ko

apni gustaKHi pe nadim hun magar kya KHub hai

dhup ki diwar par likhna shabih-e-yar ko

aise kaTta hai jigar aise lahu hota hai dil

kaise kaise aazmata hun nafas ki dhaar ko

nachta hai mere nabzon mein KHarosh-e-KHun ke sath

dhaDkanen ginti hain us ke panw ki raftar ko

reza reza chun raha hun jism-o-jaan ki saaten

Dha raha hai koi meri umr ki diwar ko

ek saat ki judai bhi nahin mujh ko qubul

sath rakhta hun sada yaad-e-firaq-e-yar ko