kawish-e-gham bhi hai zalim aur teri yaad bhi

kāvish-e-ġham bhī hai zālim aur terī yaad bhī

ye dil-e-muztar mirā vīrāñ bhī hai ābād bhī

kyā sazā.eñ sochī haiñ kuchh kījiye irshād bhī

lījiye hāzir huuñ maiñ bhī aur dil-e-nāshād bhī

roz ik taaza sitam vo bhī na.e andāz se

daad le hī chhoḌtī hai aap kī bedād bhī

diid ke qābil agar hai be-sutūñ par jū-e-shīr

ik sabaq ibrat kā hai ḳhūn-e-sar-e-farhād bhī

ye na pūchho kis tarah kab kis liye kis vāste

bas ye kaafī hai vahāñ hotī hai merī yaad bhī

pahlī hī manzil meñ dekho us ne himmat haar dī

āsmāñ sar par uThā kar rah ga.ī fariyād bhī

bulbuloñ kā pūchhnā ghabrā ke ye sayyād se

ham asīrān-e-qafas hoñge kabhī āzād bhī

imtihāñ ham saḳht-jānoñ kā koī kyā khel thā

dekho paanī ho gayā ab ḳhanjar-e-faulād bhī

jis tarah tujh ko mile haiñ aish-o-rāhat ke sharīk

mil rahegā koī mujh nāshād ko nāshād bhī

the sitamgar ab zamāne kī ravish ko dekh kar

rafta rafta ho ga.e tum to sitam-ījād bhī

jis ke ḳhvāhāñ the hasīñ jis dil pe mujh ko naaz thā

kuchh ḳhabar bhī hai tumheñ vo ho gayā barbād bhī

tang-dil rakhtā hai zālim har ghaḌī tū kyoñ mujhe

Dar hai ghuT ghuT kar na uktā jaa.e terī yaad bhī

ġhair jhūTā hai bhalā maiñ bevafā tum ko kahūñ

us kī ranjish kyā na ho jis baat kī buniyād bhī

va.ada-e-mahshar vo kar ke ḳhud hī yuuñ kahne lage

ho to sab kuchh jab rahe is bhiiḌ meñ kuchh yaad bhī

kaam aa jaatī hai aksar ishq meñ dīvāngī

maiñ agar samjho to huuñ pāband bhī āzād bhī

maiñ ne dekhā hai mohabbat kā asar donoñ tarah

ye kabhī ābād kartī hai kabhī barbād bhī

nā-tavānī kā burā ho vo to aa.e vaqt-e-naz.a

ruk ga.ī hoñToñ tak aa kar āḳhirī fariyād bhī

ai 'fahīm' us shoḳh kī haiñ sab adā.eñ intiḳhāb

bā-mazā hai us sitam-ījād kī bedād bhī

kawish-e-gham bhi hai zalim aur teri yaad bhi

ye dil-e-muztar mera viran bhi hai aabaad bhi

kya sazaen sochi hain kuchh kijiye irshad bhi

lijiye hazir hun main bhi aur dil-e-nashad bhi

roz ek taza sitam wo bhi nae andaz se

dad le hi chhoDti hai aap ki bedad bhi

did ke qabil agar hai be-sutun par ju-e-shir

ek sabaq ibrat ka hai KHun-e-sar-e-farhad bhi

ye na puchho kis tarah kab kis liye kis waste

bas ye kafi hai wahan hoti hai meri yaad bhi

pahli hi manzil mein dekho us ne himmat haar di

aasman sar par uTha kar rah gai fariyaad bhi

bulbulon ka puchhna ghabra ke ye sayyaad se

hum asiran-e-qafas honge kabhi aazad bhi

imtihan hum saKHt-jaanon ka koi kya khel tha

dekho pani ho gaya ab KHanjar-e-faulad bhi

jis tarah tujh ko mile hain aish-o-rahat ke sharik

mil rahega koi mujh nashad ko nashad bhi

the sitamgar ab zamane ki rawish ko dekh kar

rafta rafta ho gae tum to sitam-ijad bhi

jis ke KHwahan the hasin jis dil pe mujh ko naz tha

kuchh KHabar bhi hai tumhein wo ho gaya barbaad bhi

tang-dil rakhta hai zalim har ghaDi tu kyon mujhe

Dar hai ghuT ghuT kar na ukta jae teri yaad bhi

ghair jhuTa hai bhala main bewafa tum ko kahun

us ki ranjish kya na ho jis baat ki buniyaad bhi

wada-e-mahshar wo kar ke KHud hi yun kahne lage

ho to sab kuchh jab rahe is bhiD mein kuchh yaad bhi

kaam aa jati hai aksar ishq mein diwangi

main agar samjho to hun paband bhi aazad bhi

main ne dekha hai mohabbat ka asar donon tarah

ye kabhi aabaad karti hai kabhi barbaad bhi

na-tawani ka bura ho wo to aae waqt-e-naza

ruk gai honTon tak aa kar aaKHiri fariyaad bhi

ai 'fahim' us shoKH ki hain sab adaen intiKHab

ba-maza hai us sitam-ijad ki bedad bhi