kab hai manzur ki yun jins-e-dil-e-zar bike

kab hai manzūr ki yuuñ jins-e-dil-e-zār bike

par ye vo shai hai na bechūñ bhī to sau baar bike

lauh-e-murtad pe ye mahmūd ke likh denā thā

husn vo shai hai ki lete hī ḳharīdār bike

so hī jaave mire tāle.a ke barābar aa kar

kyā ho gar baḳht-e-adū bhī sar-e-bāzār bike

hoñ ḳhalish dost duā hai ki davā ke badle

yārab is ahd meñ dard-e-dil-e-bīmār bike

bik ke yūsuf ne ḳharīdā hai vo rutba ki na pūchh

ye hī biknā hai to ham muft hī sau baar bike

poshish-e-ka.aba se kyā kam hai agar dil par hai

chāhiye mere garebāñ kā har ik taar bike

dekh kar ashk-e-musalsal ko vo aañsū bhar laa.e

laakh motī ke evaz do dur-e-shahvār bike

jab vo ġhārat-gar-e-īmāñ hai to hairat kyā hai

dair meñ jubba bike ka.abe meñ zunnār bike

hai shab-e-vasl-e-adū aur zamāna mahjūr

kyuuñ na bistar ke liye gul kī jagah ḳhaar bike

kahte haiñ zulf meñ rakhne ko haiñ kuchh dil darkār

tālib us chiiz ke haiñ jo pas-e-dīvār bike

jaama ai dast-e-junūñ aur kahāñ se lā.ūñ

le rakhūñ mol agar dāman-e-kohsār bike

asar-e-garmī-e-raftār hai ye bhī merā

ki bayābāñ meñ bahut suukh ke ashjār bike

tum ho saaqī to ajab kyā hai ki maiḳhāne meñ

evaz-e-san.at-e-jam sāġhar-e-sarshār bike

ḳhauf hai ye dil-e-be-tāb na bar meñ aa jaa.e

ham na leñ mol jo vo turra-e-tarrār bike

ek bulbul rahe kis kis kī zuleḳhā.ī meñ

Dher phūloñ kā jab aa kar sar-e-bāzār bike

bār-e-isyāñ ko uThā.e hue phirtā kab tak

muft hī Taal duuñ 'sālik' jo ye ambār bike

kab hai manzur ki yun jins-e-dil-e-zar bike

par ye wo shai hai na bechun bhi to sau bar bike

lauh-e-murtad pe ye mahmud ke likh dena tha

husn wo shai hai ki lete hi KHaridar bike

so hi jawe mere talea ke barabar aa kar

kya ho gar baKHt-e-adu bhi sar-e-bazar bike

hon KHalish dost dua hai ki dawa ke badle

yarab is ahd mein dard-e-dil-e-bimar bike

bik ke yusuf ne KHarida hai wo rutba ki na puchh

ye hi bikna hai to hum muft hi sau bar bike

poshish-e-kaba se kya kam hai agar dil par hai

chahiye mere gareban ka har ek tar bike

dekh kar ashk-e-musalsal ko wo aansu bhar lae

lakh moti ke ewaz do dur-e-shahwar bike

jab wo ghaarat-gar-e-iman hai to hairat kya hai

dair mein jubba bike kabe mein zunnar bike

hai shab-e-wasl-e-adu aur zamana mahjur

kyun na bistar ke liye gul ki jagah KHar bike

kahte hain zulf mein rakhne ko hain kuchh dil darkar

talib us chiz ke hain jo pas-e-diwar bike

jama ai dast-e-junun aur kahan se laun

le rakhun mol agar daman-e-kohsar bike

asar-e-garmi-e-raftar hai ye bhi mera

ki bayaban mein bahut sukh ke ashjar bike

tum ho saqi to ajab kya hai ki maiKHane mein

ewaz-e-sanat-e-jam saghar-e-sarshaar bike

KHauf hai ye dil-e-be-tab na bar mein aa jae

hum na len mol jo wo turra-e-tarrar bike

ek bulbul rahe kis kis ki zuleKHai mein

Dher phulon ka jab aa kar sar-e-bazar bike

bar-e-isyan ko uThae hue phirta kab tak

muft hi Tal dun 'salik' jo ye ambar bike