kab ho saka hai dil ka mudawa tere baghair

kab ho sakā hai dil kā mudāvā tire baġhair

hogā tirā marīz na achchhā tire baġhair

sabr-o-qarār-e-ishq 'ibārat tujhī se hai

bātil hai zabt-e-dard kā dā'vā tire baġhair

is tarah ab jahāñ meñ huuñ goyā nahīñ huuñ maiñ

kaisī badal ga.ī mirī duniyā tire baġhair

bālīñ par aa ki maut sukūñ se nasīb ho

jiinā to ab nahīñ hai gavāra tire baġhair

har mauj-e-mai hai ik rag-e-ḳhūñ-bār hijr meñ

kyā hoñge aah sāġhar-o-mīnā tire baġhair

terī tajalliyoñ se haiñ sab kī tajalliyāñ

jalva nahīñ hai koī bhī jalvā tire baġhair

ye barq be-qarār hai dāmān-e-abr meñ

yā muztarib hai dil pas-e-parda tire baġhair

tū uTh ke kyā chalā ki chalī jaan jism se

dushvār ho gayā mujhe jaisā tire baġhair

kyā zikr-e-mehr-o-māh ki ai mehr-o-māh-e-husn

chamkā na aaj tak koī zarra tire baġhair

begāna-e-hayāt hai har lamha-e-firāq

kis tarah jī sake koī tanhā tire baġhair

tū dekhtā hai dekh sakā kab maiñ ġhair ko

vā ho sakī na chashm-e-tamāshā tire baġhair

ai barq-e-husn dil kī fazā par bhī ik jhalak

tārīk hai ye tūr-e-tajallī tire baġhair

zarra bhī apne dasht se begāna ho gayā

bāham judā haiñ qatra-o-dariyā tire baġhair

jab tū nahīñ nazar meñ to nazroñ ko kyā karūñ

kis kaam kā ye dīda-e-bīnā tire baġhair

gar aaj terī qadr nahīñ ai 'junūñ' na ho

ro.egā apne haal pe fardā tire baġhair

kab ho saka hai dil ka mudawa tere baghair

hoga tera mariz na achchha tere baghair

sabr-o-qarar-e-ishq 'ibarat tujhi se hai

baatil hai zabt-e-dard ka da'wa tere baghair

is tarah ab jahan mein hun goya nahin hun main

kaisi badal gai meri duniya tere baghair

baalin par aa ki maut sukun se nasib ho

jina to ab nahin hai gawara tere baghair

har mauj-e-mai hai ek rag-e-KHun-bar hijr mein

kya honge aah saghar-o-mina tere baghair

teri tajalliyon se hain sab ki tajalliyan

jalwa nahin hai koi bhi jalwa tere baghair

ye barq be-qarar hai daman-e-abr mein

ya muztarib hai dil pas-e-parda tere baghair

tu uTh ke kya chala ki chali jaan jism se

dushwar ho gaya mujhe jaisa tere baghair

kya zikr-e-mehr-o-mah ki ai mehr-o-mah-e-husn

chamka na aaj tak koi zarra tere baghair

begana-e-hayat hai har lamha-e-firaq

kis tarah ji sake koi tanha tere baghair

tu dekhta hai dekh saka kab main ghair ko

wa ho saki na chashm-e-tamasha tere baghair

ai barq-e-husn dil ki faza par bhi ek jhalak

tarik hai ye tur-e-tajalli tere baghair

zarra bhi apne dasht se begana ho gaya

baham juda hain qatra-o-dariya tere baghair

jab tu nahin nazar mein to nazron ko kya karun

kis kaam ka ye dida-e-bina tere baghair

gar aaj teri qadr nahin ai 'junun' na ho

roega apne haal pe farda tere baghair