kab kaha humne ki hum ko apna shana dijiye

kab kahā ham ne ki ham ko apnā shānā dījiye

aap to rone kā bas koī bahānā dījiye

ham divānoñ ko nahīñ darkār koThī aur mahal

denā hai to apne dil meñ āshiyānā dījiye

chhīn liije chāhe phir ham se dar-o-dīvār aap

yā-ḳhudā us ko magar achchhā gharānā dījiye

is qadar ḳhāmoshī bhī achchhī nahīñ mahfil meñ dost

daad denī gar nahīñ aatī to tā'na dījiye

muntazir haiñ 'harsh' vo din bhī kabhī aa.e ki jab

ham unheñ boleñ ajī suntī ho khānā dījiye

kab kaha hum ne ki hum ko apna shana dijiye

aap to rone ka bas koi bahana dijiye

hum diwanon ko nahin darkar koThi aur mahal

dena hai to apne dil mein aashiyana dijiye

chhin lije chahe phir hum se dar-o-diwar aap

ya-KHuda us ko magar achchha gharana dijiye

is qadar KHamoshi bhi achchhi nahin mahfil mein dost

dad deni gar nahin aati to ta'na dijiye

muntazir hain 'harsh' wo din bhi kabhi aae ki jab

hum unhen bolen aji sunti ho khana dijiye