kab kaha mal-o-zar nagin baKHshe

kab kahā māl-o-zar nagīñ baḳhshe

vo jo merā hai to yaqīñ baḳhshe

apne ho kar bhī ġhair lagte haiñ

kaise is ghar ko haiñ makīñ baḳhshe

jis ko sajde kī bhī na ho taufīq

aisī maġhrūr na jabīñ baḳhshe

ḳhāliq-e-kul se iltijā hai mirī

achchhe ash'ār kī zamīñ baḳhshe

maut se kaisā ḳhauf muflis ko

tājvar us ne to nahīñ baḳhshe

dost sad-shauq baiTheñ pahlū meñ

kaun ab un ko āstīñ baḳhshe

ham ko bulvā.e yā chalā aa.e

ham ko kuchh vaqt vo kahīñ baḳhshe

ab dilāsa na 'ishq de mujh ko

jo bhī denā hai sab yahīñ baḳhshe

vasl yā hijr hī sahī 'ambar'

kuchh to sauġhāt vo hasīñ baḳhshe

kab kaha mal-o-zar nagin baKHshe

wo jo mera hai to yaqin baKHshe

apne ho kar bhi ghair lagte hain

kaise is ghar ko hain makin baKHshe

jis ko sajde ki bhi na ho taufiq

aisi maghrur na jabin baKHshe

KHaliq-e-kul se iltija hai meri

achchhe ash'ar ki zamin baKHshe

maut se kaisa KHauf muflis ko

tajwar us ne to nahin baKHshe

dost sad-shauq baiThen pahlu mein

kaun ab un ko aastin baKHshe

hum ko bulwae ya chala aae

hum ko kuchh waqt wo kahin baKHshe

ab dilasa na 'ishq de mujh ko

jo bhi dena hai sab yahin baKHshe

wasl ya hijr hi sahi 'ambar'

kuchh to saughat wo hasin baKHshe