kab kahan humne ki meamar-e-ghazal hum bhi hain

kab kahāñ ham ne ki me.amār-e-ġhazal ham bhī haiñ

haañ sambhāle hue mīnār-e-ġhazal ham bhī haiñ

'ġhālib'-o-'mīr' shahanshāh-e-suḳhan haiñ lekin

apne ḳhitte meñ zamīñdār-e-ġhazal ham bhī haiñ

ham ne bhī ḳhūn-e-jigar de ke sañvārā hai ise

sāhibo ġhāza-e-ruḳhsār-e-ġhazal ham bhī haiñ

ham samajhte haiñ ġhazal kaise kahī jaatī hai

vāqif-e-azmat-o-me.ār-e-ġhazal ham bhī haiñ

us ke dāman pe ka.ī daaġh lage haiñ ham se

sach to ye hai ki gunahgār-e-ġhazal ham bhī haiñ

ham ko fan aatā hai lafzoñ kī masīhā.ī kā

aur sabab ye hai ki bīmār-e-ġhazal ham bhī haiñ

tājirān-e-suḳhan-o-sher pe kyā tanz kareñ

ḳhitta-e-raunaq-e-bāzār-e-ġhazal ham bhī haiñ

apnā bhī zikr hai arbāb-e-suḳhan meñ 'vāsif'

ye bahut hai ki parastār-e-ġhazal ham bhī haiñ

kab kahan hum ne ki meamar-e-ghazal hum bhi hain

han sambhaale hue minar-e-ghazal hum bhi hain

'ghaalib'-o-'mir' shahanshah-e-suKHan hain lekin

apne KHitte mein zamindar-e-ghazal hum bhi hain

hum ne bhi KHun-e-jigar de ke sanwara hai ise

sahibo ghaza-e-ruKHsar-e-ghazal hum bhi hain

hum samajhte hain ghazal kaise kahi jati hai

waqif-e-azmat-o-mear-e-ghazal hum bhi hain

us ke daman pe kai dagh lage hain hum se

sach to ye hai ki gunahgar-e-ghazal hum bhi hain

hum ko fan aata hai lafzon ki masihai ka

aur sabab ye hai ki bimar-e-ghazal hum bhi hain

tajiran-e-suKHan-o-sher pe kya tanz karen

KHitta-e-raunaq-e-bazar-e-ghazal hum bhi hain

apna bhi zikr hai arbab-e-suKHan mein 'wasif'

ye bahut hai ki parastar-e-ghazal hum bhi hain