kab KHamoshi ko mohabbat ki zaban samjha tha main

kab ḳhamoshī ko mohabbat kī zabāñ samjhā thā maiñ

thā 'ayāñ vo rāz-e-dil jis ko nihāñ samjhā thā maiñ

sun rahā huuñ apnī ḳhāmoshī kā charchā kū-ba-kū

thī fuġhāñ vo bhī jise zabt-e-fuġhāñ samjhā thā maiñ

'ārzī sā 'aks thā ik iltifāt-e-dost kā

jis ko nādānī se aish-e-jāvedāñ samjhā thā maiñ

tum ne āñkheñ pher liiñ mujh se to ye mujh par khulā

ḳhār-zār-e-zindagī ko gulsitāñ samjhā thā maiñ

vo bhī nikle barq-o-bād-o-bāġhbāñ kī milkiyat

chaar tinke jin ko apnā āshiyāñ samjhā thā maiñ

kar sakeñ 'darshan' na vo bhī arz-e-hāl-e-ārzū

jin nigāhoñ ko mohabbat kī zabāñ samjhā thā maiñ

kab KHamoshi ko mohabbat ki zaban samjha tha main

tha 'ayan wo raaz-e-dil jis ko nihan samjha tha main

sun raha hun apni KHamoshi ka charcha ku-ba-ku

thi fughan wo bhi jise zabt-e-fughan samjha tha main

'arzi sa 'aks tha ek iltifat-e-dost ka

jis ko nadani se aish-e-jawedan samjha tha main

tum ne aankhen pher lin mujh se to ye mujh par khula

KHar-zar-e-zindagi ko gulsitan samjha tha main

wo bhi nikle barq-o-baad-o-baghban ki milkiyat

chaar tinke jin ko apna aashiyan samjha tha main

kar saken 'darshan' na wo bhi arz-e-haal-e-arzu

jin nigahon ko mohabbat ki zaban samjha tha main