kab kis baat se dil TuTa hai apni kis se yari hai

kab kis baat se dil TuuTā hai apnī kis se yaarī hai

merī vahshat nārāzī hai aur vo sirf tumhārī hai

añgḌā.ī ne kaale bādal Daal diye haiñ shānoñ par

chaah ne gesū khol diye haiñ din ne raat guzārī hai

ruuh se ruuh kā mel hai ya.anī rūhoñ kī parchhā.ī meñ

jism pe jism kī ārā.ish hai sharm kī parda-dārī hai

mujh ko in kaliyoñ kī rangat aur adā se kyā matlab

bhañvaroñ kī phūloñ se sirf havas kī rishtedārī hai

har ehsās nayā ik lafz aur har ik lafz nayā ehsās

jismoñ kī uryāñ taḳhtī par poroñ kī fankārī hai

ishq junūñ hai ishq sukūñ hai ishq hī ranj-o-gumāñ ya.anī

ishq diloñ kā aib nahīñ hai zehnoñ kī purkārī hai

kab kis baat se dil TuTa hai apni kis se yari hai

meri wahshat naraazi hai aur wo sirf tumhaari hai

angDai ne kale baadal Dal diye hain shanon par

chah ne gesu khol diye hain din ne raat guzari hai

ruh se ruh ka mel hai yani ruhon ki parchhai mein

jism pe jism ki aaraish hai sharm ki parda-dari hai

mujh ko in kaliyon ki rangat aur ada se kya matlab

bhanwaron ki phulon se sirf hawas ki rishtedari hai

har ehsas naya ek lafz aur har ek lafz naya ehsas

jismon ki uryan taKHti par poron ki fankari hai

ishq junun hai ishq sukun hai ishq hi ranj-o-guman yani

ishq dilon ka aib nahin hai zehnon ki purkari hai