kab koi tujh sa aaina-ru yan hai dusra

kab koī tujh sā ā.īna-rū yaañ hai dūsrā

hai tū tirā hī aks numāyāñ hai dūsrā

pūchh us kī mat ḳhabar jise nāseh siye thā to

vo dhajjiyāñ uḌā ye garebāñ hai dūsrā

shakl un kī ye hai jo ki haiñ mahv-e-jamāl-e-yār

shashdar khaḌā hai ek to hairāñ hai dūsrā

ruḳh us kā dekhiyo shab-e-mahtāb meñ koī

goyā zamīñ pe ye mah-e-tābāñ hai dūsrā

kyā dil jigar kī kahiye tamannā-e-vasl meñ

hasrat bharā hai ek pur-armāñ hai dūsrā

vādī-e-ishq meñ hameñ barsoñ yuuñ hī kaTe

ik dasht tai kiyā ki bayābāñ hai dūsrā

tere ḳhirām-e-nāz ke sadqe ki kab koī

aisā chaman meñ sarv-ḳhirāmāñ hai dūsrā

ġham-ḳhvār-o-mūnis ab tire bīmār ke haiñ yuuñ

taskīn ek de to hirāsāñ hai dūsrā

'jur.at' ġhazal paḌh aur ik aisī ki sab kaheñ

kab is tarah kā koī ġhazal-ḳhvāñ hai dūsrā

kab koi tujh sa aaina-ru yan hai dusra

hai tu tera hi aks numayan hai dusra

puchh us ki mat KHabar jise naseh siye tha to

wo dhajjiyan uDa ye gareban hai dusra

shakl un ki ye hai jo ki hain mahw-e-jamal-e-yar

shashdar khaDa hai ek to hairan hai dusra

ruKH us ka dekhiyo shab-e-mahtab mein koi

goya zamin pe ye mah-e-taban hai dusra

kya dil jigar ki kahiye tamanna-e-wasl mein

hasrat bhara hai ek pur-arman hai dusra

wadi-e-ishq mein hamein barson yun hi kaTe

ek dasht tai kiya ki bayaban hai dusra

tere KHiram-e-naz ke sadqe ki kab koi

aisa chaman mein sarw-KHiraman hai dusra

gham-KHwar-o-munis ab tere bimar ke hain yun

taskin ek de to hirasan hai dusra

'jurat' ghazal paDh aur ek aisi ki sab kahen

kab is tarah ka koi ghazal-KHwan hai dusra