kab milta hai sukh-chain hamein kab gham se rihai hoti hai

kab miltā hai sukh-chain hameñ kab ġham se rihā.ī hotī hai

har vaqt kaleja phuñktā hai lab par jaan aa.ī hotī hai

har vaqt hai dil meñ yaad tirī nazroñ meñ tere jalve haiñ

man-mandir meñ rahne vaale kab tujh se judā.ī hotī hai

chupke se bazm-e-tasavvur meñ rātoñ ko koī aa jaatā hai

baḌh jaatī hai raunaq-e-bazm-e-dil jis dam tanhā.ī hotī hai

tum kyā samjho tum kyā jaano chhalnī dil kaise hote haiñ

ye dard-e-mohabbat kyā shai hai kyā chiiz judā.ī hotī hai

le de ke faqat ik dil hī thā so vo bhī kisī ne luuT liyā

duniyā meñ nahīñ kuchh bhī apnā har chiiz parā.ī hotī hai

tap tap kar fikr kī bhaTTī meñ ash.ār jo dil se nikalte haiñ

vo sehr-e-mujassam hote haiñ un meñ ra.anā.ī hotī hai

jis desh meñ gangā bahtī hai us des ke baasī paapī haiñ

hotī hai jang zabānoñ par maz.hab pe laḌā.ī hotī hai

duniyā meñ 'bahār' sharāfat kā koī bhī nahīñ pursāñ hotā hai

makkāroñ dhoka-bāzoñ kī ab to shunavā.ī hotī hai

kab milta hai sukh-chain hamein kab gham se rihai hoti hai

har waqt kaleja phunkta hai lab par jaan aai hoti hai

har waqt hai dil mein yaad teri nazron mein tere jalwe hain

man-mandir mein rahne wale kab tujh se judai hoti hai

chupke se bazm-e-tasawwur mein raaton ko koi aa jata hai

baDh jati hai raunaq-e-bazm-e-dil jis dam tanhai hoti hai

tum kya samjho tum kya jaano chhalni dil kaise hote hain

ye dard-e-mohabbat kya shai hai kya chiz judai hoti hai

le de ke faqat ek dil hi tha so wo bhi kisi ne luT liya

duniya mein nahin kuchh bhi apna har chiz parai hoti hai

tap tap kar fikr ki bhaTTi mein ashaar jo dil se nikalte hain

wo sehr-e-mujassam hote hain un mein ranai hoti hai

jis desh mein ganga bahti hai us des ke basi papi hain

hoti hai jang zabanon par mazhab pe laDai hoti hai

duniya mein 'bahaar' sharafat ka koi bhi nahin pursan hota hai

makkaron dhoka-bazon ki ab to shunawai hoti hai