kab meri halqa-e-wahshat se rihai hui hai

kab mirī halqa-e-vahshat se rihā.ī huī hai

dil ne ik aur bhī zanjīr banā.ī huī hai

aur kyā hai mire dāman meñ mohabbat ke sivā

yahī daulat mirī mehnat se kamā.ī huī hai

ishq meñ jur.at-e-tafrīq nahīñ qais ko bhī

tū ne kyuuñ dasht meñ dīvār uThā.ī huī hai

terī sūrat jo maiñ dekhūñ to gumāñ hotā hai

to koī nazm hai jo vajd meñ aa.ī huī hai

ik parī-zād ke yādoñ meñ utar aane se

zindagī vasl kī bārish meñ nahā.ī huī hai

apnī miTTī se mohabbat hai mohabbat hai mujhe

isī miTTī ne mirī shaan baḌhā.ī huī hai

sāmne baiTh ke dekhā thā use vasl kī raat

aur vo raat hī āsāb pe chhā.ī huī hai

tum ga.e ho ye vatan chhoḌ ke jis din se 'sa.īd'

ik udāsī dar o dīvār pe chhā.ī huī hai

kab meri halqa-e-wahshat se rihai hui hai

dil ne ek aur bhi zanjir banai hui hai

aur kya hai mere daman mein mohabbat ke siwa

yahi daulat meri mehnat se kamai hui hai

ishq mein jurat-e-tafriq nahin qais ko bhi

tu ne kyun dasht mein diwar uThai hui hai

teri surat jo main dekhun to guman hota hai

to koi nazm hai jo wajd mein aai hui hai

ek pari-zad ke yaadon mein utar aane se

zindagi wasl ki barish mein nahai hui hai

apni miTTi se mohabbat hai mohabbat hai mujhe

isi miTTi ne meri shan baDhai hui hai

samne baiTh ke dekha tha use wasl ki raat

aur wo raat hi aasab pe chhai hui hai

tum gae ho ye watan chhoD ke jis din se 'said'

ek udasi dar o diwar pe chhai hui hai