kab miTae se miTa ranj-o-suubat ka asar

kab miTā.e se miTā ranj-o-su.ūbat kā asar

hai vatan meñ bhī mire chehre pe ġhurbat kā asar

ho chalā ishq-e-majāzī pe haqīqat kā asar

aa chalā mujh ko nazar kasrat meñ vahdat kā asar

saarī duniyā se nahīñ mujh se faqat bezār the

aur is se baḌh ke kyā hotā mohabbat kā asar

be-vafā un kā laqab hai bā-vafā merā ḳhitāb

vo hai tīnat kī ḳharābī ye hai ulfat kā asar

mo.ajiza dekhā tasavvur kā to āñkheñ khul ga.iiñ

pā rahā huuñ aaj maiñ jalvat meñ ḳhalvat kā asar

vo parī se huur ban jaate yaqīnī baat thī

un kī sīrat par agar paḌ jaatā sūrat kā asar

un pe dil hī aa gayā le hī ga.e vo merā dil

ye taqāzā husn kā thā vo sharārat kā asar

ik jagah rahtā na thā Tik kar ye aadat thī mirī

khīñch laayā ḳhuld tak ab mujh ko vahshat kā asar

ḳhair se milte jo bad-ḳhūnī hai chehre se ayaañ

ye masal sach hai ki ho jaatā hai sohbat kā asar

aap kyā the ho ga.e kyā faiz se ustād ke

dekh liije 'shād' ye hotā hai nisbat kā asar

kab miTae se miTa ranj-o-suubat ka asar

hai watan mein bhi mere chehre pe ghurbat ka asar

ho chala ishq-e-majazi pe haqiqat ka asar

aa chala mujh ko nazar kasrat mein wahdat ka asar

sari duniya se nahin mujh se faqat bezar the

aur is se baDh ke kya hota mohabbat ka asar

be-wafa un ka laqab hai ba-wafa mera KHitab

wo hai tinat ki KHarabi ye hai ulfat ka asar

moajiza dekha tasawwur ka to aankhen khul gain

pa raha hun aaj main jalwat mein KHalwat ka asar

wo pari se hur ban jate yaqini baat thi

un ki sirat par agar paD jata surat ka asar

un pe dil hi aa gaya le hi gae wo mera dil

ye taqaza husn ka tha wo shararat ka asar

ek jagah rahta na tha Tik kar ye aadat thi meri

khinch laya KHuld tak ab mujh ko wahshat ka asar

KHair se milte jo bad-KHuni hai chehre se ayan

ye masal sach hai ki ho jata hai sohbat ka asar

aap kya the ho gae kya faiz se ustad ke

dekh lije 'shad' ye hota hai nisbat ka asar