kab se hun muntazir ki bula le qaza mujhe

kab se huuñ muntazir ki bulā le qazā mujhe

par chhoḌtī nahīñ ye badan kī qabā mujhe

apne laboñ pe sar kī tarah tū sajā mujhe

naġhma huuñ tere pyaar kā tū gungunā mujhe

maiñ ne hī tujh se tark kiye the ta'alluqāt

ab ḳhuuñ rulā rahā hai mirā faisla mujhe

dīpak kī tarah kab se tire intizār meñ

jal jal ke thak gayā huuñ tū aa kar bujhā mujhe

bāhar se hañs rahā huuñ magar tere hijr ne

andar se kar diyā hai bahut khokhlā mujhe

muddat ke baa'd ghar jo maiñ aaya huuñ lauT kar

hairat se dekhtā hai bahut aa.ina mujhe

rotā huuñ jāgtā huuñ sisaktā huuñ rāt-bhar

kis jurm kī milī hai ye āḳhir sazā mujhe

jī chāhtā hai chīḳh paḌūñ apne haal par

ḳhāmoshiyāñ na kar de kahīñ be-sadā mujhe

raġhbat sī ho ga.ī hai kuchh apne hī marz se

ai chārāgar na de tū koī ab davā mujhe

merā akelā-pan hī mujhe maar Dāltā

miltā na shā.erī kā agar aasrā mujhe

daur-e-hayāt ne to na chhoḌī kasar koī

ik 'sant' thā jo detā rahā hausla mujhe

kab se hun muntazir ki bula le qaza mujhe

par chhoDti nahin ye badan ki qaba mujhe

apne labon pe sar ki tarah tu saja mujhe

naghma hun tere pyar ka tu gunguna mujhe

main ne hi tujh se tark kiye the ta'alluqat

ab KHun rula raha hai mera faisla mujhe

dipak ki tarah kab se tere intizar mein

jal jal ke thak gaya hun tu aa kar bujha mujhe

bahar se hans raha hun magar tere hijr ne

andar se kar diya hai bahut khokhla mujhe

muddat ke ba'd ghar jo main aaya hun lauT kar

hairat se dekhta hai bahut aaina mujhe

rota hun jagta hun sisakta hun raat-bhar

kis jurm ki mili hai ye aaKHir saza mujhe

ji chahta hai chiKH paDun apne haal par

KHamoshiyan na kar de kahin be-sada mujhe

raghbat si ho gai hai kuchh apne hi marz se

ai chaaragar na de tu koi ab dawa mujhe

mera akela-pan hi mujhe mar Dalta

milta na shaeri ka agar aasra mujhe

daur-e-hayat ne to na chhoDi kasar koi

ek 'sant' tha jo deta raha hausla mujhe