kab tabiat ko ras aae hain

kab tabī.at ko raas aa.e haiñ

ye jo dil par ġhamoñ ke saa.e haiñ

rahzanoñ se nahīñ koī shikva

rahbaroñ se fareb khaa.e haiñ

sard rātoñ meñ sard aahoñ ne

ashk āñkhoñ hī meñ jamā.e haiñ

chāñdnī ne safed maḳhmal par

aaj jaadū ka.ī jagā.e haiñ

haif ye niyyatoñ ke khoTe log

aap hī apnā ghar jalā.e haiñ

vaqt kī kyā sitam-zarīfī hai

jo the apne vahī parā.e haiñ

merī himmat ko marhabā kahiye

āñdhiyoñ meñ diye jalā.e haiñ

'nāz' tārīkī-e-tavahhum meñ

ilm hī ne diye jalā.e haiñ

kab tabiat ko ras aae hain

ye jo dil par ghamon ke sae hain

rahzanon se nahin koi shikwa

rahbaron se fareb khae hain

sard raaton mein sard aahon ne

ashk aankhon hi mein jamae hain

chandni ne safed maKHmal par

aaj jadu kai jagae hain

haif ye niyyaton ke khoTe log

aap hi apna ghar jalae hain

waqt ki kya sitam-zarifi hai

jo the apne wahi parae hain

meri himmat ko marhaba kahiye

aandhiyon mein diye jalae hain

'naz' tariki-e-tawahhum mein

ilm hi ne diye jalae hain