kab tak ai shoKH jafa-pesha-e-gulfam nahin

kab tak ai shoḳh jafā-pesha-e-gulfām nahīñ

din nahīñ raat nahīñ sub.h nahīñ shaam nahīñ

bhūltā yaad jo terī dil-e-nākām nahīñ

mujh ko turbat meñ pas-e-marg bhī ārām nahīñ

barq kī tarah taḌapne ke sivā kaam nahīñ

dil-e-betāb ko mere kabhī ārām nahīñ

bā.is-e-josh-e-junūñ zulf-e-siyah-fām nahīñ

vahshat-angez badaḳhshāñ kī magar shaam nahīñ

nik.hat-e-gul kī tarah āshiq-e-vārasta mizāj

basta-e-silsila-e-gardish-e-ayyām nahīñ

ḳhidmateñ lete ho kyoñ ġhair se har sub.h-o-masā

aap ke kaam kā kyā āshiq-e-nākām nahīñ

haath se silsila-e-josh-e-junūñ chhūT gayā

sar ko jis din se sar-e-zulf-e-siyah-fām nahīñ

shikva-e-pīr-e-muġhāñ sun ke jo yuuñ pī jaa.e

aisā be-ḳhud to koī rind-e-mai-āshām nahīñ

ġhair se bigḌe haiñ ġhusse meñ bhare baiThe haiñ

arz-e-hāl-e-dil-e-muztar kā ye hangām nahīñ

ḳhuun lene se ye saudā kahīñ kam hotā hai

puḳhta-maġhzoñ kā junūñ chāragaro ḳhaam nahīñ

hai lab-e-bām vo ḳhurshīd-laqā jalva-farosh

diid kā izn magar haa.e ġhazab aam nahīñ

bulbul-e-zamzama-sanj-e-dil-e-āshiq ko hai daam

ruḳh pe bikhrī huī vo zulf-e-siyah-fām nahīñ

hai parastish but-e-pindār kī har sub.h-o-masā

aap bhī shaiḳh jī kyā banda-e-asnām nahīñ

gardish-e-qismat-e-nā-sāz kā shikva hai mujhe

mujh ko hargiz gila-e-gardish-e-ayyām nahīñ

jis qadar chāhe kare gor kā vo aaj shikār

gor se bhaag ke bach jā.egā bahrām nahīñ

gor hī gor kī bhī raah dikhā.egā tujhe

kyā ḳhabar is kī tujhe pahle se bahrām nahīñ

shab-e-hijrāñ kī nahīñ hotī hai jis tarah sahar

roz-e-furqat kī bhī ai 'badr' kabhī shaam nahīñ

kab tak ai shoKH jafa-pesha-e-gulfam nahin

din nahin raat nahin subh nahin sham nahin

bhulta yaad jo teri dil-e-nakaam nahin

mujh ko turbat mein pas-e-marg bhi aaram nahin

barq ki tarah taDapne ke siwa kaam nahin

dil-e-betab ko mere kabhi aaram nahin

bais-e-josh-e-junun zulf-e-siyah-fam nahin

wahshat-angez badaKHshan ki magar sham nahin

nikhat-e-gul ki tarah aashiq-e-warasta mizaj

basta-e-silsila-e-gardish-e-ayyam nahin

KHidmaten lete ho kyon ghair se har subh-o-masa

aap ke kaam ka kya aashiq-e-nakaam nahin

hath se silsila-e-josh-e-junun chhuT gaya

sar ko jis din se sar-e-zulf-e-siyah-fam nahin

shikwa-e-pir-e-mughan sun ke jo yun pi jae

aisa be-KHud to koi rind-e-mai-asham nahin

ghair se bigDe hain ghusse mein bhare baiThe hain

arz-e-haal-e-dil-e-muztar ka ye hangam nahin

KHun lene se ye sauda kahin kam hota hai

puKHta-maghzon ka junun chaaragaro KHam nahin

hai lab-e-baam wo KHurshid-laqa jalwa-farosh

did ka izn magar hae ghazab aam nahin

bulbul-e-zamzama-sanj-e-dil-e-ashiq ko hai dam

ruKH pe bikhri hui wo zulf-e-siyah-fam nahin

hai parastish but-e-pindar ki har subh-o-masa

aap bhi shaiKH ji kya banda-e-asnam nahin

gardish-e-qismat-e-na-saz ka shikwa hai mujhe

mujh ko hargiz gila-e-gardish-e-ayyam nahin

jis qadar chahe kare gor ka wo aaj shikar

gor se bhag ke bach jaega bahram nahin

gor hi gor ki bhi rah dikhaega tujhe

kya KHabar is ki tujhe pahle se bahram nahin

shab-e-hijran ki nahin hoti hai jis tarah sahar

roz-e-furqat ki bhi ai 'badr' kabhi sham nahin