kab tak khinchi lakir pe hi chalte jaen hum

kab tak khiñchī lakīr pe hī chalte jaa.eñ ham

aao ki ab nayā koī rasta banā.eñ ham

bātoñ meñ aa ke ek sitāra-misāl kī

ḳhadsha hai jān-e-man na tumheñ bhuul jaa.eñ ham

itne kaḌe the kos ki mohlat na mil sakī

kuchh der rāste meñ kahīñ baiTh jaa.eñ ham

ma.alūm hai ki aane se qāsir hai ek shaḳhs

kyā us ke intizār meñ āñkheñ jalā.eñ ham

yuuñ dekhiye to koī baḌī baat bhī nahīñ

phir talḳhiyoñ kā yaar sabab kyā batā.eñ ham

jab faisle hoñ nām-o-nasab dekh kar 'vasīm'

zanjīr ḳhaak adl kī jā kar hilā.eñ ham

kab tak khinchi lakir pe hi chalte jaen hum

aao ki ab naya koi rasta banaen hum

baaton mein aa ke ek sitara-misal ki

KHadsha hai jaan-e-man na tumhein bhul jaen hum

itne kaDe the kos ki mohlat na mil saki

kuchh der raste mein kahin baiTh jaen hum

malum hai ki aane se qasir hai ek shaKHs

kya us ke intizar mein aankhen jalaen hum

yun dekhiye to koi baDi baat bhi nahin

phir talKHiyon ka yar sabab kya bataen hum

jab faisle hon nam-o-nasab dekh kar 'wasim'

zanjir KHak adl ki ja kar hilaen hum