kab talak is KHamushi ki tarjumani ho

kab talak is ḳhāmushī kī tarjumānī ho

'ishq kā iz.hār ab to muñh-zabānī ho

mehmāñ dil ke bano to mehrbānī ho

kab talak is dard-e-dil kī mezbānī ho

kis ke ashkoñ ne kiyā khārā samundar ko

ab 'atā sāgar ko bhī kuchh mīThā paanī ho

lutf aatā hī nahīñ auroñ ko paḌhne meñ

darj pannoñ meñ hamārī bhī kahānī ho

peḌ kaT ke bhī kisī kā ghar banātā hai

kaam aa.e sab ke aisī zindagānī ho

ḳhāmushī ko ham vahāñ apnāte haiñ aksar

bolnā apnā jahāñ bhī be-ma'ānī ho

kas ke bāñhoñ meñ use baiThā huā hai vo

ziist jaise ye 'amit' kī jāvedānī ho

kab talak is KHamushi ki tarjumani ho

'ishq ka izhaar ab to munh-zabani ho

mehman dil ke bano to mehrbani ho

kab talak is dard-e-dil ki mezbani ho

kis ke ashkon ne kiya khaara samundar ko

ab 'ata sagar ko bhi kuchh miTha pani ho

lutf aata hi nahin auron ko paDhne mein

darj pannon mein hamari bhi kahani ho

peD kaT ke bhi kisi ka ghar banata hai

kaam aae sab ke aisi zindagani ho

KHamushi ko hum wahan apnate hain aksar

bolna apna jahan bhi be-ma'ani ho

kas ke banhon mein use baiTha hua hai wo

zist jaise ye 'amit' ki jawedani ho