kab talak ye shola-e-be-rang manzar dekhiye

kab talak ye shola-e-be-rañg manzar dekhiye

kyuuñ na harf-e-sabz hī likh kar zamīñ par dekhiye

phir kahīñ sahrā-e-jāñ meñ khā.iye taaza fareb

phir sarāb-e-chashma o aks-e-sanobar dekhiye

leT rahiye band kar ke āñkheñ jaltī dhuup meñ

aur phir sabz o siyah sūraj kā manzar dekhiye

phir barahna shāḳhoñ ke saa.e meñ dam liije kahīñ

reñgte sāñpoñ ko apne tan ke uupar dekhiye

daad diije shaukat-e-ta.amīr-e-arsh-o-farsh kī

aur phir buniyād-e-hast-o-būd Dhā kar dekhiye

chāñdnī rātoñ meñ ek aaseb ban kar ghūmiye

ghar kī dīvāroñ par apnā saaya be-sar dekhiye

hai jigar kis kā jo is teġh-e-hunar kī daad de

apne hāthoñ zaḳhm khā kar apnā jauhar dekhiye

be-dilī kī tah meñ ġhota maar kar baiThe haiñ ham

'zeb' phir paanī pe kab ubhregā patthar dekhiye

kab talak ye shola-e-be-rang manzar dekhiye

kyun na harf-e-sabz hi likh kar zamin par dekhiye

phir kahin sahra-e-jaan mein khaiye taza fareb

phir sarab-e-chashma o aks-e-sanobar dekhiye

leT rahiye band kar ke aankhen jalti dhup mein

aur phir sabz o siyah suraj ka manzar dekhiye

phir barahna shaKHon ke sae mein dam lije kahin

rengte sanpon ko apne tan ke upar dekhiye

dad dije shaukat-e-tamir-e-arsh-o-farsh ki

aur phir buniyaad-e-hast-o-bud Dha kar dekhiye

chandni raaton mein ek aaseb ban kar ghumiye

ghar ki diwaron par apna saya be-sar dekhiye

hai jigar kis ka jo is tegh-e-hunar ki dad de

apne hathon zaKHm kha kar apna jauhar dekhiye

be-dili ki tah mein ghota mar kar baiThe hain hum

'zeb' phir pani pe kab ubhrega patthar dekhiye