kabhi ab tujh pe dil ai sang-dil aane nahin denge

kabhī ab tujh pe dil ai sang-dil aane nahīñ deñge

ki ab patthar se is shīshe ko Takrāne nahīñ deñge

ḳhayāl-e-yār bhī aa.e to ham aane nahīñ deñge

kisī zālim ko bhī ab dil ko taḌpāne nahīñ deñge

ba-sad-shauq aao jaao dil se aañkh aur aañkh se dil meñ

magar dil chhoḌ kar jaao to ham jaane nahīñ deñge

agar vus'at meñ lā-mahdūd bhī ho dāman-e-rahmat

to ham bhī dāman-e-‘isyāñ ko sharmāne nahīñ deñge

vo shāh-e-husn-e-jannat ho ki shāh-e-husn-e-'ālam ho

koī bhī ho kisī ko dil ke nazrāne nahīñ deñge

hamāre dostoñ se to hamāre qarz-ḳhvāh achchhe

nahīñ kahte ki mar kahte haiñ mar jaane nahīñ deñge

hazār ehsās sham' soz-e-parvāna kā rakhtī ho

ijāzat us ko jal-bujhne kī parvāne nahīñ deñge

hameñ ḳhvāh 'aam hī karnā paḌe faizān-e-mai-ḳhāna

magar ham shaiḳh ko duniyā ko bahkāne nahīñ deñge

badal deñge ḳhayāl-e-yār se ḳhalvat ko jalvat meñ

kabhī ham dil ko tanhā.ī meñ ghabrāne nahīñ deñge

batā ai husn agar 'aql-o-ḳhirad se kaam leñ ham bhī

to phir dil kaun degā dil jo dīvāne nahīñ deñge

ye nazzāroñ meñ kho kar ghar kā rasta bhuul jaatā hai

akele tifl-e-dil ko ab kahīñ jaane nahīñ deñge

ham āvāra-mizājoñ kī na pūchho ham agar chāheñ

janāb-e-ḳhizr ko bhī raah par aane nahīñ deñge

chhupā kar dil meñ le jā.eñge jo jo dil pe guzrī hai

ham is nā-qadr duniyā ko ye afsāne nahīñ deñge

amārat ke zaḳhīre ai 'amar' bharpūr kitne hoñ

bhikārī ko magar ye muTThī-bhar daane nahīñ deñge

kabhi ab tujh pe dil ai sang-dil aane nahin denge

ki ab patthar se is shishe ko Takrane nahin denge

KHayal-e-yar bhi aae to hum aane nahin denge

kisi zalim ko bhi ab dil ko taDpane nahin denge

ba-sad-shauq aao jao dil se aankh aur aankh se dil mein

magar dil chhoD kar jao to hum jaane nahin denge

agar wus'at mein la-mahdud bhi ho daman-e-rahmat

to hum bhi daman-e-‘isyan ko sharmane nahin denge

wo shah-e-husn-e-jannat ho ki shah-e-husn-e-'alam ho

koi bhi ho kisi ko dil ke nazrane nahin denge

hamare doston se to hamare qarz-KHwah achchhe

nahin kahte ki mar kahte hain mar jaane nahin denge

hazar ehsas sham' soz-e-parwana ka rakhti ho

ijazat us ko jal-bujhne ki parwane nahin denge

hamein KHwah 'am hi karna paDe faizan-e-mai-KHana

magar hum shaiKH ko duniya ko bahkane nahin denge

badal denge KHayal-e-yar se KHalwat ko jalwat mein

kabhi hum dil ko tanhai mein ghabrane nahin denge

bata ai husn agar 'aql-o-KHirad se kaam len hum bhi

to phir dil kaun dega dil jo diwane nahin denge

ye nazzaron mein kho kar ghar ka rasta bhul jata hai

akele tifl-e-dil ko ab kahin jaane nahin denge

hum aawara-mizajon ki na puchho hum agar chahen

janab-e-KHizr ko bhi rah par aane nahin denge

chhupa kar dil mein le jaenge jo jo dil pe guzri hai

hum is na-qadr duniya ko ye afsane nahin denge

amarat ke zaKHire ai 'amar' bharpur kitne hon

bhikari ko magar ye muTThi-bhar dane nahin denge