kabhi azabon mein bas rahi hai kabhi ye KHwabon mein kaT rahi hai

kabhī azāboñ meñ bas rahī hai kabhī ye ḳhvāboñ meñ kaT rahī hai

ye muḳhtasar sī hai zindagī jo hazār ḳhānoñ meñ baT rahī hai

kahīñ pe ḳhushiyoñ kī bārisheñ haiñ kahīñ pe naġhmāt-e-aish-o-mastī

magar ġharīboñ ke gulshanoñ se ḳhizāñ hī baḌh kar lipaT rahī hai

kahāñ hai jazbe mohabbatoñ ke kahāñ hai rasm-e-vafā-parastī

milī thī tahzīb kī badaulat vahī mohabbat to ghaT rahī hai

lage haiñ baḌhne nazar nazar meñ fahāshiyoñ ke tamām sapne

saroñ pe sāya-fagan thī kal tak ridā hayā kī simaT rahī hai

jo sin-rasīda shajar the saare jaḌoñ se apnī ukhaḌ rahe haiñ

zamīñ ke rishtoñ kī chhāñv yaaro saroñ se apne bhī chhaT rahī hai

kise sunā.eñge ab vo 'zākir' ki chāhatoñ meñ kashish nahīñ hai

nazar se ojhal maiñ ho rahā huuñ nigah se vo bhī to haT rahī hai

kabhi azabon mein bas rahi hai kabhi ye KHwabon mein kaT rahi hai

ye muKHtasar si hai zindagi jo hazar KHanon mein baT rahi hai

kahin pe KHushiyon ki barishen hain kahin pe naghmat-e-aish-o-masti

magar gharibon ke gulshanon se KHizan hi baDh kar lipaT rahi hai

kahan hai jazbe mohabbaton ke kahan hai rasm-e-wafa-parasti

mili thi tahzib ki badaulat wahi mohabbat to ghaT rahi hai

lage hain baDhne nazar nazar mein fahashiyon ke tamam sapne

saron pe saya-fagan thi kal tak rida haya ki simaT rahi hai

jo sin-rasida shajar the sare jaDon se apni ukhaD rahe hain

zamin ke rishton ki chhanw yaro saron se apne bhi chhaT rahi hai

kise sunaenge ab wo 'zakir' ki chahaton mein kashish nahin hai

nazar se ojhal main ho raha hun nigah se wo bhi to haT rahi hai