kabhi banta kabhi miTta hun shayad

kabhī bantā kabhī miTtā huuñ shāyad

maiñ apne vahm kā saayā huuñ shāyad

na koī mujh ko ab tak paḌh sakā hai

havāoñ par kahīñ likkhā huuñ shāyad

mujhe merā samandar DhūñDhtā hai

maiñ ik bhaTkā huā dariyā huuñ shāyad

badal jaate haiñ ḳhadd-o-ḳhāl mere

maiñ mar kar bhī nahīñ martā huuñ shāyad

kahāñ hai merī marg-e-nā-gahānī

usī kī aas meñ zinda huuñ shāyad

tujhe kho kar akelā ho gayā thā

tujhe pā kar bhī maiñ tanhā huuñ shāyad

ḳhud apne qatl kā chaska hai mujh ko

ḳhud apne ḳhuun kā pyāsā huuñ shāyad

azal se maiñ musalsal chal rahā huuñ

thakan se TūTtā lamha huuñ shāyad

na jaane kaun mujh meñ kho gayā hai

kisī ko DhūñDne niklā huuñ shāyad

mujhe rokā gayā thā jis dishā se

usī jānib chalā aayā huuñ shāyad

mujhe pahchān le ā.īne mere

maiñ terā gum-shuda chehrā huuñ shāyad

kabhi banta kabhi miTta hun shayad

main apne wahm ka saya hun shayad

na koi mujh ko ab tak paDh saka hai

hawaon par kahin likkha hun shayad

mujhe mera samandar DhunDhta hai

main ek bhaTka hua dariya hun shayad

badal jate hain KHadd-o-KHal mere

main mar kar bhi nahin marta hun shayad

kahan hai meri marg-e-na-gahani

usi ki aas mein zinda hun shayad

tujhe kho kar akela ho gaya tha

tujhe pa kar bhi main tanha hun shayad

KHud apne qatl ka chaska hai mujh ko

KHud apne KHun ka pyasa hun shayad

azal se main musalsal chal raha hun

thakan se TuTta lamha hun shayad

na jaane kaun mujh mein kho gaya hai

kisi ko DhunDne nikla hun shayad

mujhe roka gaya tha jis disha se

usi jaanib chala aaya hun shayad

mujhe pahchan le aaine mere

main tera gum-shuda chehra hun shayad