kabhi bhule-bisre jo main kahin kisi mai-kade mein chala gaya

kabhī bhūle-bisre jo maiñ kahīñ kisī mai-kade meñ chalā gayā

mire naam aayā hai jaam agar na liyā gayā na piyā gayā

gayā bazm-e-husn-o-jamāl meñ jo maiñ shauq-e-arz-e-talab liye

mire zehn-o-dil kā vo haal thā ki zabāñ se kuchh na kahā gayā

mire nāma-bar ne jo ḳhat diyā mujhe lā ke jān-e-bahār kā

huī zehn-o-dil kī vo kaifiyat na paḌhā gayā na sunā gayā

ba-hazār koshish-o-justujū mirā zaḳhm-e-dil na huā rafū

lage laakh marham-e-rañg-o-bū na bharā gayā na siyā gayā

tirī be-ruḳhī ne diyā vo ġham jo kisī tarah bhī huā na kam

mujhe ghun kī tarah lagā rahā mirī zindagānī ko khā gayā

vo tajassus apnā bhī ḳhuub thā ki talāsh-e-haq thī jagah jagah

magar apne dil pe paḌī nazar to maiñ ek lamhe meñ pā gayā

hai 'amīr' dil meñ vahī chamak jo paḌī thī nuur kī ik jhalak

vahī ek partav-e-husn to mirī zindagī ko sajā gayā

kabhi bhule-bisre jo main kahin kisi mai-kade mein chala gaya

mere nam aaya hai jam agar na liya gaya na piya gaya

gaya bazm-e-husn-o-jamal mein jo main shauq-e-arz-e-talab liye

mere zehn-o-dil ka wo haal tha ki zaban se kuchh na kaha gaya

mere nama-bar ne jo KHat diya mujhe la ke jaan-e-bahaar ka

hui zehn-o-dil ki wo kaifiyat na paDha gaya na suna gaya

ba-hazar koshish-o-justuju mera zaKHm-e-dil na hua rafu

lage lakh marham-e-rang-o-bu na bhara gaya na siya gaya

teri be-ruKHi ne diya wo gham jo kisi tarah bhi hua na kam

mujhe ghun ki tarah laga raha meri zindagani ko kha gaya

wo tajassus apna bhi KHub tha ki talash-e-haq thi jagah jagah

magar apne dil pe paDi nazar to main ek lamhe mein pa gaya

hai 'amir' dil mein wahi chamak jo paDi thi nur ki ek jhalak

wahi ek partaw-e-husn to meri zindagi ko saja gaya