kabhi bhule se mumkin ho meri jaanib agar hona

kabhī bhūle se mumkin ho mirī jānib agar honā

to auroñ kī taraf se apnī nazreñ pher kar honā

musalsal hijr ke sadme ye dil ab sah nahīñ saktā

ghaḌī bhar kā judā honā agar bār-e-digar honā

ġhanīmat hai ki ik rasmī ta.āruf to mayassar hai

nahīñ āsāñ kisī mah-vash kā manzūr-e-nazar honā

na honā tum kisī ke bhī yahāñ par ham-safar yāro!

agar honā samajh kar soch kar kuchh dekh kar honā

nahīñ hai bā.is-e-āzār-e-jāñ tarz-e-amal koī

magar us kā mire baare meñ aksar be-ḳhabar honā

vo sun lete haiñ yuuñ to sher mere rū-ba-rū phir bhī

zarūrī to nahīñ har dil pe sheroñ kā asar honā

maiñ apnī zaat meñ jaisā bhī huuñ jo kuchh bhī huuñ 'nāsir'

farishtoñ se kahīñ behtar hai mujh sā bhī bashar honā

kabhi bhule se mumkin ho meri jaanib agar hona

to auron ki taraf se apni nazren pher kar hona

musalsal hijr ke sadme ye dil ab sah nahin sakta

ghaDi bhar ka juda hona agar bar-e-digar hona

ghanimat hai ki ek rasmi taaruf to mayassar hai

nahin aasan kisi mah-wash ka manzur-e-nazar hona

na hona tum kisi ke bhi yahan par ham-safar yaro!

agar hona samajh kar soch kar kuchh dekh kar hona

nahin hai bais-e-azar-e-jaan tarz-e-amal koi

magar us ka mere bare mein aksar be-KHabar hona

wo sun lete hain yun to sher mere ru-ba-ru phir bhi

zaruri to nahin har dil pe sheron ka asar hona

main apni zat mein jaisa bhi hun jo kuchh bhi hun 'nasir'

farishton se kahin behtar hai mujh sa bhi bashar hona