kabhi bulao, kabhi mere ghar bhi aaya karo

kabhī bulāo, kabhī mere ghar bhī aayā karo

yahī hai rasm-e-mohabbat, ise nibhāyā karo

tumhāre jism ke ash.ār mujh ko bhāte haiñ

mirī vafā kī ġhazal tum bhī gungunāyā karo

tumhāre vasl kī rātoñ kī lazzatoñ kī qasam

mujhe judā.ī ke manzar na ab dikhāyā karo

qarīb aao, in āñkhoñ kī justujū dekho

hayāt ban ke mire saath jagmagāyā karo

sharīf-zādoñ kī bejā ḳhatāoñ se milne

yatīm-ḳhānoñ ke bachchoñ se milne jaayā karo

hamāre hisse meñ maañ kī duā.eñ aa.iiñ 'kañval'

tum apne hisse kī daulat se ghar sajāyā karo

kabhi bulao, kabhi mere ghar bhi aaya karo

yahi hai rasm-e-mohabbat, ise nibhaya karo

tumhaare jism ke ashaar mujh ko bhate hain

meri wafa ki ghazal tum bhi gungunaya karo

tumhaare wasl ki raaton ki lazzaton ki qasam

mujhe judai ke manzar na ab dikhaya karo

qarib aao, in aankhon ki justuju dekho

hayat ban ke mere sath jagmagaya karo

sharif-zadon ki beja KHataon se milne

yatim-KHanon ke bachchon se milne jaya karo

hamare hisse mein man ki duaen aain 'kanwal'

tum apne hisse ki daulat se ghar sajaya karo