kabhi dil mein utar jaana kabhi dil se utar jaana

kabhī dil meñ utar jaanā kabhī dil se utar jaanā

yahī hai dilbarī un kī mirā ghuT ghuT ke mar jaanā

chaman meñ jo huā us kā na do ilzām gulchīñ ko

bahāroñ kā ḳhafā honā gulāboñ kā bikhar jaanā

tumhāre haath meñ sūraj tumhāre haath meñ taare

ai qāsid le ke lailā ko mirī rah se guzar jaanā

kareñ shikva kisī se kyā yahī qismat hamārī thī

vahī dushman nikal aayā jise bhī mo'tabar jaanā

baḌā hī ḳhvār kartī hai mirī nāzuk-mizājī bhī

kahīñ par zabt kar jaanā kahīñ par aañkh bhar jaanā

hamārī sādgī dekheñ 'adū ke saath chal nikle

takalluf hī takalluf meñ use bhī ham-safar jaanā

mujhe to hādsoñ ne hī kisī sūrat na dī mohlat

kabhī zindāñ ko jā nikle kabhī sahrā ko ghar jaanā

na daulat hai na shohrat hai mohabbat kyā musībat hai

ai pyāre dost kuchh ilzām mere naam kar jaanā

nigāh-e-yār bhī qātil 'adū ke vaar bhī qātil

kaleja thaam kar tū bhī vahāñ ai nāma-bar jaanā

hameñ har haal meñ jiinā hai aur har haal meñ marnā

ye kaisā khel hai 'barham' idhar rahnā udhar jaanā

kabhi dil mein utar jaana kabhi dil se utar jaana

yahi hai dilbari un ki mera ghuT ghuT ke mar jaana

chaman mein jo hua us ka na do ilzam gulchin ko

bahaaron ka KHafa hona gulabon ka bikhar jaana

tumhaare hath mein suraj tumhaare hath mein tare

ai qasid le ke laila ko meri rah se guzar jaana

karen shikwa kisi se kya yahi qismat hamari thi

wahi dushman nikal aaya jise bhi mo'tabar jaana

baDa hi KHwar karti hai meri nazuk-mizaji bhi

kahin par zabt kar jaana kahin par aankh bhar jaana

hamari sadgi dekhen 'adu ke sath chal nikle

takalluf hi takalluf mein use bhi ham-safar jaana

mujhe to hadson ne hi kisi surat na di mohlat

kabhi zindan ko ja nikle kabhi sahra ko ghar jaana

na daulat hai na shohrat hai mohabbat kya musibat hai

ai pyare dost kuchh ilzam mere nam kar jaana

nigah-e-yar bhi qatil 'adu ke war bhi qatil

kaleja tham kar tu bhi wahan ai nama-bar jaana

hamein har haal mein jina hai aur har haal mein marna

ye kaisa khel hai 'barham' idhar rahna udhar jaana