kabhi dimagh kabhi dil sata raha hai mujhe

kabhī dimāġh kabhī dil satā rahā hai mujhe

ye kaisā dard mire ham-navā diyā hai mujhe

ubhar ga.e haiñ sarāpā nuqūsh āñkhoñ meñ

vo harf harf bahut yaad aa rahā hai mujhe

tumhāre husn kī tā'rīf likhtā phirtā huuñ

zamāna aise hī shā'ir samajh rahā hai mujhe

kiyā hai is tarah badnām 'ishq ne tere

tirī galī kā har ik shaḳhs jāntā hai mujhe

koī mile na mile farq kuchh nahīñ paḌtā

bas ek tum se zamāne meñ vāsta hai mujhe

maiñ in pe rakh sakūñ ilzām qatl kā apne

tumhārī āñkhoñ se itnā to fā.eda hai mujhe

maiñ japtā phirtā huuñ terā hī naam har lamha

tirī nigāh ne pāgal banā diyā hai mujhe

tumhāre naam se 'shāriq-alī’ huā mansūb

tumhāre naam zamāne ne likh diyā hai mujhe

kabhi dimagh kabhi dil sata raha hai mujhe

ye kaisa dard mere ham-nawa diya hai mujhe

ubhar gae hain sarapa nuqush aankhon mein

wo harf harf bahut yaad aa raha hai mujhe

tumhaare husn ki ta'rif likhta phirta hun

zamana aise hi sha'ir samajh raha hai mujhe

kiya hai is tarah badnam 'ishq ne tere

teri gali ka har ek shaKHs jaanta hai mujhe

koi mile na mile farq kuchh nahin paDta

bas ek tum se zamane mein wasta hai mujhe

main in pe rakh sakun ilzam qatl ka apne

tumhaari aankhon se itna to faeda hai mujhe

main japta phirta hun tera hi nam har lamha

teri nigah ne pagal bana diya hai mujhe

tumhaare nam se 'shaariq-ali’ hua mansub

tumhaare nam zamane ne likh diya hai mujhe