kabhi haqiqat ke aaine mein kabhi libas-e-majaz mein hai

kabhī haqīqat ke aa.ine meñ kabhī libās-e-majāz meñ hai

hazār-hā shakl tere jalvoñ kī dīda-e-imtiyāz meñ hai

tirī mohabbat ke dā.ere ne jo had banā dī hai bandagī kī

vo ḳhatt-e-taqdīr ban ke raushan mirī jabīn-e-niyāz meñ hai

hazāroñ ā.īne apne hāthoñ banā banā ke haiñ toḌ Daale

magar na ab tak miTī vo hairat jo chashm-e-ā.īna-sāz meñ hai

jo baat kahnī na thī vo kah dī hañsī hañsī meñ kalī kalī ne

magar samajhte haiñ ahl-e-gulshan ki raaz gulshan kā raaz meñ hai

abhī to us sang-e-āstāñ kā nishān tak bhī nazar na aaya

abhī se kaisī taḌap ye paidā mirī jabīn-e-niyāz meñ hai

anokhe mazmūñ haiñ pech-o-ḳham ke nirāle unvāñ shikan shikan ke

azal se afsāna-e-mohabbat kisī kī zulf-e-darāz meñ hai

mire taḳhayyul ko raas kyā aa.e hind kā ḳhār-zār 'muslim'

nasheman is tā.ir-e-ḳhush-ilhāñ kā gulsitān-e-hijāz meñ he

kabhi haqiqat ke aaine mein kabhi libas-e-majaz mein hai

hazar-ha shakl tere jalwon ki dida-e-imtiyaz mein hai

teri mohabbat ke daere ne jo had bana di hai bandagi ki

wo KHatt-e-taqdir ban ke raushan meri jabin-e-niyaz mein hai

hazaron aaine apne hathon bana bana ke hain toD Dale

magar na ab tak miTi wo hairat jo chashm-e-aina-saz mein hai

jo baat kahni na thi wo kah di hansi hansi mein kali kali ne

magar samajhte hain ahl-e-gulshan ki raaz gulshan ka raaz mein hai

abhi to us sang-e-astan ka nishan tak bhi nazar na aaya

abhi se kaisi taDap ye paida meri jabin-e-niyaz mein hai

anokhe mazmun hain pech-o-KHam ke nirale unwan shikan shikan ke

azal se afsana-e-mohabbat kisi ki zulf-e-daraaz mein hai

mere taKHayyul ko ras kya aae hind ka KHar-zar 'muslim'

nasheman is tair-e-KHush-ilhan ka gulsitan-e-hijaz mein he