kabhi hota hai pareshan kabhi sharmata hai

kabhī hotā hai pareshāñ kabhī sharmātā hai

ā.īna mere ḳhad-o-ḳhāl se ghabrātā hai

reñgte reñgte ik aah mujhe khīñchtī hai

aur ik ḳhauf mire jism meñ dar aatā hai

ḳhud bhī maiñ ḳhāk-zada ḳhasta badan huuñ pa mujhe

apne kashkol kī hālat pe taras aatā hai

yak-ba-yak ek charāġh apnī taraf khīñchtā huuñ

azhdahā dekhtā hai aur lipaT jaatā hai

kitnā mānūs hai mujh se tire hoñToñ kā sukūt

muskurā.ūñ to mire halq tak aa jaatā hai

rafta rafta mujhe jhinjhoḌtā hai sabz-e-ḳhudā

jaise dīmak koī lakḌī kī ġhizā khātā hai

shaam ke vaqt lahū rang-e-mohabbat kī tarah

koī aatā hai rulātā hai chalā jaatā hai

kabhi hota hai pareshan kabhi sharmata hai

aaina mere KHad-o-KHal se ghabraata hai

rengte rengte ek aah mujhe khinchti hai

aur ek KHauf mere jism mein dar aata hai

KHud bhi main KHak-zada KHasta badan hun pa mujhe

apne kashkol ki haalat pe taras aata hai

yak-ba-yak ek charagh apni taraf khinchta hun

azhdaha dekhta hai aur lipaT jata hai

kitna manus hai mujh se tere honTon ka sukut

muskuraun to mere halq tak aa jata hai

rafta rafta mujhe jhinjhoDta hai sabz-e-KHuda

jaise dimak koi lakDi ki ghiza khata hai

sham ke waqt lahu rang-e-mohabbat ki tarah

koi aata hai rulata hai chala jata hai