kabhi jo bhule se dil mein KHayal-e-yar aaya

kabhī jo bhūle se dil meñ ḳhayāl-e-yār aayā

shabāb-e-rafta ko maiñ duur tak pukār aayā

kuchh is adā se mirā jān-e-intizār aayā

mujhe ḳhud apnī nazar par na e.atibār aayā

kiyā thā aane kā va.ada vo ek baar aayā

na aa sakā sar-e-bālīñ sar-e-mazār aayā

ye merī aah kī tāsīr thī yā us kī zid

vo be-qarār huā jab mujhe qarār aayā

balā.eñ le ke mire zaḳhm-e-dil ko chuum liyā

sitam-zarīf ko aayā to kis pe pyaar aayā

hamāre baad jo aa.e haiñ pūchh lo un se

ki un ke paañv ke nīche bhī koī ḳhaar aayā

jis aa.ine ko nazar bhar ke maiñ ne dekh liyā

us aa.ine meñ nazar mujh ko aks-e-yār aayā

pilā.ī thī mire saaqī ne jis meñ pahle-pahal

vo jaam mere tasavvur meñ bār-bār aayā

sunī thī apnī hī āvāz dasht-e-vahshat meñ

maiñ apne aap ko chāroñ taraf pukār aayā

gayā thā tark-e-mohabbat kā faisla karne

magar maiñ āḳhirī baazī bhī un se haar aayā

dil-o-jigar ko luTā kar nazar-guzar ke liye

maiñ tere husn kā sadqa bhī aaj utaar aayā

kabhi jo bhule se dil mein KHayal-e-yar aaya

shabab-e-rafta ko main dur tak pukar aaya

kuchh is ada se mera jaan-e-intizar aaya

mujhe KHud apni nazar par na eatibar aaya

kiya tha aane ka wada wo ek bar aaya

na aa saka sar-e-baalin sar-e-mazar aaya

ye meri aah ki tasir thi ya us ki zid

wo be-qarar hua jab mujhe qarar aaya

balaen le ke mere zaKHm-e-dil ko chum liya

sitam-zarif ko aaya to kis pe pyar aaya

hamare baad jo aae hain puchh lo un se

ki un ke panw ke niche bhi koi KHar aaya

jis aaine ko nazar bhar ke main ne dekh liya

us aaine mein nazar mujh ko aks-e-yar aaya

pilai thi mere saqi ne jis mein pahle-pahal

wo jam mere tasawwur mein bar-bar aaya

suni thi apni hi aawaz dasht-e-wahshat mein

main apne aap ko chaaron taraf pukar aaya

gaya tha tark-e-mohabbat ka faisla karne

magar main aaKHiri bazi bhi un se haar aaya

dil-o-jigar ko luTa kar nazar-guzar ke liye

main tere husn ka sadqa bhi aaj utar aaya