kabhi jo uljhe junun se KHirad ne tham liya

kabhī jo uljhe junūñ se ḳhirad ne thaam liyā

kabhī to ham ne junūñ se ḳhirad kā kaam liyā

tirī nigāh-e-ḳhumārīñ meñ jaane kyā shai thī

chhalak ke jaam rahā jab bhī ham ne jaam liyā

ufuq pe ḳhvāb ke ubhre hazār-hā mahtāb

kabhī jo tū ne nigāh-e-ġhalat se kaam liyā

lagā dī aag junūñ ne tamām gulshan ko

kisī ne hosh meñ jo rang-o-bū kā naam liyā

kahāñ na uljhe havādis se zindagī ke liye

hujūm-e-ġham meñ tabassum se ham ne kaam liyā

kabhi jo uljhe junun se KHirad ne tham liya

kabhi to hum ne junun se KHirad ka kaam liya

teri nigah-e-KHumarin mein jaane kya shai thi

chhalak ke jam raha jab bhi hum ne jam liya

ufuq pe KHwab ke ubhre hazar-ha mahtab

kabhi jo tu ne nigah-e-ghalat se kaam liya

laga di aag junun ne tamam gulshan ko

kisi ne hosh mein jo rang-o-bu ka nam liya

kahan na uljhe hawadis se zindagi ke liye

hujum-e-gham mein tabassum se hum ne kaam liya