kabhi-kabhaar nahin ta-hayat dete hain

kabhī-kabhār nahīñ tā-hayāt dete haiñ

daraḳht apne phaloñ kī zakāt dete haiñ

buḳhārā aur samarqand kuchh nahīñ ham to

us ek til ke evaz kā.enāt dete haiñ

koī zabānī kalāmī nahīñ diyā tujh ko

ham apne dil ke tumheñ kāġhzāt dete haiñ

vo chāñd jhiil kī āġhosh meñ utartā huā

sitāre pahra vahāñ saarī raat dete haiñ

nikal bhī sakte the us ek-ādh mushkil se

vo ham ko saath ka.ī mushkilāt dete haiñ

ye zahr zahr kā tiryāk hai hamāre liye

hameñ to ashk bhī āb-e-hayāt dete haiñ

farishtagān-e-qazā dā.ī-e-ajal kī qasam

ġham-e-hayāt se ham ko najāt dete haiñ

sab ek saath haiñ hirs-o-havas ke nukte par

dikhā.e kis ko vo chaudah nikāt dete haiñ

hamesha koī jahāñ meñ nahīñ rahā phir bhī

duā sabāt kī ham be-sabāt dete haiñ

kabhi-kabhaar nahin ta-hayat dete hain

daraKHt apne phalon ki zakat dete hain

buKHara aur samarqand kuchh nahin hum to

us ek til ke ewaz kaenat dete hain

koi zabani kalami nahin diya tujh ko

hum apne dil ke tumhein kaghzat dete hain

wo chand jhil ki aaghosh mein utarta hua

sitare pahra wahan sari raat dete hain

nikal bhi sakte the us ek-adh mushkil se

wo hum ko sath kai mushkilat dete hain

ye zahr zahr ka tiryak hai hamare liye

hamein to ashk bhi aab-e-hayat dete hain

farishtagan-e-qaza dai-e-ajal ki qasam

gham-e-hayat se hum ko najat dete hain

sab ek sath hain hirs-o-hawas ke nukte par

dikhae kis ko wo chaudah nikat dete hain

hamesha koi jahan mein nahin raha phir bhi

dua sabaat ki hum be-sabaat dete hain