kabhi kabhi mere ghar se bhi jab KHushi guzri

kabhī kabhī mere ghar se bhī jab ḳhushī guzrī

mujhe lagā ki añdheroñ se raushnī guzrī

har ik hañsī ke pas-e-parda bhiiḌ thī ġham kī

magar laboñ se bazāhir mire ḳhushī guzrī

guzishta roz se vo aa.ina rahā hai mirā

mirī hayāt usī se milī-julī guzrī

bichhaḌ ke mujh se agar vo na rah sakā hogā

baġhair us ke mujhe bhī ḳhalish yahī guzrī

'ajab 'ajab se dikhā.e hayāt ne kartab

kabhī ubhartī kabhī naav Dūbtī guzrī

dilā ke yaad mujhe phir se kar ga.ī ġhamgīñ

ġhamoñ kī jab bhī 'ibārat koī likhī guzrī

har ek lamha mirā guzrā is tarah 'shamshād'

ki jaise gardish-e-hālāt kī sadī guzrī

kabhi kabhi mere ghar se bhi jab KHushi guzri

mujhe laga ki andheron se raushni guzri

har ek hansi ke pas-e-parda bhiD thi gham ki

magar labon se bazahir mere KHushi guzri

guzishta roz se wo aaina raha hai mera

meri hayat usi se mili-juli guzri

bichhaD ke mujh se agar wo na rah saka hoga

baghair us ke mujhe bhi KHalish yahi guzri

'ajab 'ajab se dikhae hayat ne kartab

kabhi ubharti kabhi naw Dubti guzri

dila ke yaad mujhe phir se kar gai ghamgin

ghamon ki jab bhi 'ibarat koi likhi guzri

har ek lamha mera guzra is tarah 'shamshad'

ki jaise gardish-e-haalat ki sadi guzri