kabhi KHamosh rah kar bhi pukara kafi hota hai

kabhī ḳhāmosh rah kar bhī pukārā kaafī hotā hai

samajhne vāloñ ko to bas ishāra kaafī hotā hai

izāfa is meñ kar letā huuñ maiñ apnī taraf se bhī

yahāñ bas dekh lenā hī tumhārā kaafī hotā hai

kabhī to fā.eda bhī dene lag jā.egā vo mujh ko

ki pahle pahle vaise bhī ḳhasāra kaafī hotā hai

ye aisī maar hai jis kā nishāñ tak bhī nahīñ paḌtā

par is meñ aadmī andar se maarā kaafī hotā hai

vo pahle kī tarah vāre-niyāre to nahīñ lekin

maiñ koshish kartā rahtā huuñ guzāra kaafī hotā hai

to zāhir hai ki ye sab chhoḌ kar kuchh aur kar leñ ham

agar nuqsān is meñ bhī hamārā kaafī hotā hai

safar āsānī se kaT jaatā hai bātoñ hī bātoñ meñ

kisī kā saath ho to phir sahārā kaafī hotā hai

tumhāre va.ade hote haiñ siyāsat-dānoñ vaale 'gul'

haqīqat jin meñ thoḌī aur laarā kaafī hotā hai

kabhi KHamosh rah kar bhi pukara kafi hota hai

samajhne walon ko to bas ishaara kafi hota hai

izafa is mein kar leta hun main apni taraf se bhi

yahan bas dekh lena hi tumhaara kafi hota hai

kabhi to faeda bhi dene lag jaega wo mujh ko

ki pahle pahle waise bhi KHasara kafi hota hai

ye aisi mar hai jis ka nishan tak bhi nahin paDta

par is mein aadmi andar se mara kafi hota hai

wo pahle ki tarah ware-niyare to nahin lekin

main koshish karta rahta hun guzara kafi hota hai

to zahir hai ki ye sab chhoD kar kuchh aur kar len hum

agar nuqsan is mein bhi hamara kafi hota hai

safar aasani se kaT jata hai baaton hi baaton mein

kisi ka sath ho to phir sahaara kafi hota hai

tumhaare wade hote hain siyasat-danon wale 'gul'

haqiqat jin mein thoDi aur lara kafi hota hai