kabhi KHirad se kabhi dil se dosti kar li

kabhī ḳhirad se kabhī dil se dostī kar lī

na pūchh kaise basar ham ne zindagī kar lī

añdherī raat kā manzar bhī ḳhuub thā lekin

tum aa ga.e to charāġhoñ meñ raushnī kar lī

tumhārā jism hai jāḌoñ kā sard sannāTā

harārtoñ se kahāñ tum ne dostī kar lī

huzūr-e-dost ajab hādisa huā yaaro

har ek harf-e-shikāyat ne ḳhud-kushī kar lī

liye phire haiñ bahut tum ko dil kī galiyoñ meñ

is ek baat pe duniyā ne dushmanī kar lī

har ek moḌ pe ḳhanjar-ba-kaf thī tanhā.ī

ġharīb-e-shahr ne ghabrā ke ḳhud-kushī kar lī

kabhi KHirad se kabhi dil se dosti kar li

na puchh kaise basar hum ne zindagi kar li

andheri raat ka manzar bhi KHub tha lekin

tum aa gae to charaghon mein raushni kar li

tumhaara jism hai jaDon ka sard sannaTa

hararton se kahan tum ne dosti kar li

huzur-e-dost ajab hadisa hua yaro

har ek harf-e-shikayat ne KHud-kushi kar li

liye phire hain bahut tum ko dil ki galiyon mein

is ek baat pe duniya ne dushmani kar li

har ek moD pe KHanjar-ba-kaf thi tanhai

gharib-e-shahr ne ghabra ke KHud-kushi kar li